Hatutan.com, (12 Abríl 2024), Díli- Governu hamutuk ho Prezidénsia Repúblika sei promove turizmu Timor-Leste bá mundu liuhosi Festival Rabilau ne’ebé sei realiza iha Postu administrativu Maubisse, Munisípiu Ainaro, iha fulan-Setembru 2024.

Lee Mós: Timor-Leste Sei Organiza Festivál Internasionál Foka bá Promosaun Arte-Kultura, Turizmu, Siénsia no Teknolojia

Potensia truizmu Rabilau, Postu Administrativu Maubisse, Munisípiu Ainaro. Foto/Joaquim Cotinho Racom Maubisse

Koordenadór Jerál ba Festival Rabilau, Vise-Primeiru-Ministru no Ministru Koordenadór bá Asuntu Sosiál no Ministru Dezenvolvimentu Rural no Ministru Habitasaun Komunitária, Mariano Assanami Sabino hateten, Festival Rabilau governu tau nu’udár promosaun bá turizmu Timor-Leste tamba atu promove turizmu Timor-Leste, atividade sira konsentradu ho kultura artístiku, no atividade oi-oin ne’ebé sei konsentra iha Rabilau.

Alende ne’e iha atividade desportu ne’ebé sei halo iha Díli no sei konvida mós Premiadu Nobel da Pás sira atu mai ko’alia no iha atividade siénsia teknolojia, inklui mós atividade talentu sira seluk ne’ebé aprezenta ona bá Xefe Estadu no hein katak Xefe Estadu sei avalia no fó fila fali hanoin atu Governu bele implementa.

“Data fiksu ba realizasaun festival Rabilau, tanba kondisaun klima loloos ne’e governu hanoin atu realiza iha fulan-Agostu, maibé husi autoridade lokál sira iha Postu Administrativu Maubisse sujere atu realiza iha loron 27 fulan-Setembru bá oin,” Mariano Assanami Sabino haktuir.

Governante ne’e hatutan Festival Rabilau no atividade tomak bá promosaun turizmu Timor-Leste ne’e orsamentu husi Prezidénsia Repúblika hamutuk montante millaun $1.5.

Promove Turizmu no Ekonómia Azul

Potensia truizmu Rabilau, Postu Administrativu Maubisse, Munisípiu Ainaro. Foto/Joaquim Cotinho Racom Maubisse

Vise-Primeiru-Ministru no Ministru Koordenadór ba Assuntu Ekonómiku no Ministru Turizmu no Ambiente Francisco Kalbuadi Lay, hateten atu dezenvolve setór turizmu importante tebe-tebes ida mak estabilidade.

Nia afirma estabilidade katak laiha problema, sidadaun sira tenke garante pás, tuir fali mak infraestrutura báziku depois mak fasilidade sira seluk, liu-liu ospitalidade.

“Iha momentu ida ne’e kona-ba ospitalidade iha semana liubá governu halo ona konsolidasaun ho otelaria sira, ajénsia viajen no mós na’in bá restaurante sira iha territóriu nasionál no treinamentu bá iha área sira ne’ebé presiza no konsentra mós bá iha turizmu komunitária ho turizmu sira seluk tan,” Francisco Kalbuadi Lay hateten.

Vise-Primeiru-Ministru ne’e subliña katak agora Governu konsentra mós ba ekonomia azúl, liu-liu atu promove Timor nia tasi.

Iha programa turizmu lubuk ida ne’ebé Governu hanoin atu tau prioridade maibé programa sira ne’e sei la moris iha fulan ida, rua nia laran, tanba ne’e Governu la’o tuir hela planu ne’ebé konsagra tiha ona iha planu Ministériu Turizmu nian.

Jornalista: Vito Salvadór