Hatutan.com, (07 Maiu 2024), Díli– Membru Bankada Parlamentár CNRT, Deputada  Ângela Córvelo iha nia intervensaun iha plenária uma-fukun PN, Tersa (07/05/2024), husu bá Autoridade de Inspeção e Fiscalização da Atividade Económica, Sanitária e Alimentar, Instiuto Público (AIFAESA,I.P)  atu  halo supervizaun rigor bá loja sira ne’ebé fa’an sasán no hahán  liu prazu.

Lee Mós: AIFAESA Tenke Halo Ezame Laboratóriu bá Ice Cream Molok Fa’an

Ekipa AIFAESA halo inspesaun bá loja sira hodi kontrola produtu ai-han ne’ebé liu ona prazu (expire). Foto/Dok. AIFAESA

“Preokupasaun ida kona-bá konsumu katak kuaze iha loja barak ne’ebé mak ami tama hetan produtu barak ne’ebé mak liu ona prazu. Ami haree bebida no hahán to’o sasán balu bá nesesidade feto nian mós liu prazu kuaze tinan ida,” Deputada Ângela Córvelo hateten.

Iha fatin hanesan deputada Bankada CNRT, Carminda Carlota konkorda  katak iha loja barak ne’ebé daudaun ne’e fa’an produtu importadu sira ne’ebé liu prazu hodi prejudika saúde públiku.

“Ha’u preokupa sasán balun ne’ebé iha loja liu prazu ne’e hodi prejudika tebes ita-nia povu nia saúde, ami husu mós ba iha AIFAESA atu toma atensaun ba asuntu ida ne’e,” Deputada Carminda Carlota  afirma.

Vise-Ministru asuntu Parlamentár Adérito Hugo da Costa, informa katak nia sei envia asuntu ne’e bá parte relevante hodi buka solusaun.

Jornalista Estajiária: Zita Menezes