Hatutan.com, (08 Maiu 2024), Díli– Prezidente Konsellu Konsultivu Fundu Petroliferu (CCFP, sigla portugés) Juvinal Diaz, husu Timor Gap, Empreza Públiku atu halo klarifikasaun bá Públiku relasiona ho disputa kontratuál ne’ebé halo kompañia internasionál ENERPROCO halo keixa kontra Timor Gap iha Tribunál Internasionál arbitrajen Singapura.
Lee Mós: La’o Hamutuk Husu Timor Gap Klarifika bá Públiku Kona-bá Disputa Kontratuál ho ENERPROCO
Prezidente Konsellu Konsultivu Fundu Petroliferu (CCFP, sigla portugés) Juvinal Diaz. Foto/Tome da Silva
Juvinal Diaz informa Konsellu Konsultivu Fundu Petroliferu (CCFP) reprezenta alternativu hosi uza osan fundu petroliferu iha Timor-Leste no husi pontu de vista bá kazu letigasaun ne’ebé ENERPROCO halo hasoru Timor Gap ne’e presiza iha nia klarifikasaun bá públiku.
“Primeiru ita hotu hatene katak ENERPROCO halo servisu bazeia bá kontratu ne’ebé Timor Gap rasik fó, maské manajamen ka jestaun tuan mak fó kontratu, maibé konstituinalmente Timor Gap mak fó entaun Timor Gap hanesan na’in bá rekursu tenei halo klarifikasaun bá públiku,” Prezidente CCFP, Juvinal Diaz hateten hodi responde Hatutan.com iha nia knaar fatin iha resintu Parlamentu Nasionál (PN), Kuarta (08/05/2024).
Juvinal aprezenta nia duvida kona-bá tanbasá tenke hakotu kontratu ida razaun legál ne’e saida iha razaun politíka ruma ka razaun ekonómiku ka razaun tékniku ruma, tanba ne’e Timor Gap sira tenke espliká bá públiku para povu bele hatene.
Nia afirma Timor Gap tenkr iha responsabiliza halo klarifikasaun bá públiku tanbasá hakotu kontratu no alternativu saida mak Timor Gap atuál ne’e halo kona-bá CCR Bayu Undang ne’e iha alternativu ka lae no konsekuénsia saida mak Timor-Leste infrenta karik Timor Gap lakon no responsabilidade kriminal saida mak sira sei foti karik lakon.
“Letigasaun ida-ne’e nia konsekuénsia iha rua; de’it ida todan mai Timor-Leste no ida todan bá kompañia rasik. Karik todan mai Timor-Leste ita sei selu prosesu letigasaun ne’e rasik no ita mós tenke selu dalaruma barak liu fali duké saida mak deside iha kontratu entaun ita hatene ne’e hatodan despeza estadu,” Nia haktuir.
Iha parte seluk mós katak ENERPROCO halo servisu konsultan ida atu hatene kona-bá Carbon Capture Recouce projeitu foun ida ne’ebé Governu Timor tanba ANP, Santos inisiativa tiha ona atu halo iha Bayu Undang tanba Bayu Undang maran tiha ona entaun sira tenke forma kampu bá fali projeitu Carbon Capture restorecouce sira halo estudu bá ida-ne’e.
Nia afirma tán katak tanba empreza estadu iha Timor-Leste ne’e barak mak goja osan estadu, maibé la produz buat ida bá estadu, inklui Timor Gap to’o ohin loron sira-nia reseita ne’e menus liu duké saida mak estadu fó. Tanba ne’e, sei iha konsekuénsia finanseira ka gastu finanseira ho kustu boot bainhira prosesu ne’e la’o iha Tribunál Arbitrajen iha Singapura
Nia hatutan kuandu hapara ENERPROCO nian kontratu sé karik lakon oinsá ho responsabilidade kriminál bá sira ne’ebé halo desizaun.
“Ita labele uza abitua ida uza instituisaun Estadu atu hapara kontratu ida ne’ebé fó todan bá Estadu hodi halakon osan Estadu iha prosesu sira-ne’e,” nia afirma tan.
To’o notísia ne’e publika, Hatutan.com seidauk hetan konfirmasaun ho Prezidente no CEO Timor Gap, Rui Maria Alves Soares, tanba seidauk bele permite ka seidauk iha tempu bá jornalista halo entrevista bá asuntu ne’e.
Lee Mós: Konsidera Viola Akordu Kontratuál, ENERPROCO Lori TIMOR GAP bá Tribunál Internasionál Arbitrajen
Jornalista Estajiaria : Zita Menezes