Hatutan.com, (21 Maiu 2024), Díli- Polísia Nasionál Timor-Leste (PNTL) liuhosi Unidade Tránzitu Komandu Munisípiu Díli halo apreensaun ka halibur motorizada hamutuk 23 tanba estasiona fali mór iha trotoar leten.

Lee Mós: PNTL Detein Autór Sobu Kadeira iha GMT Laran

Komandante PNTL Munisípiu Díli, Superintendente Xefe Polísia Orlando Gomes. Foto/Tome da Silva

Komandante PNTL Munisípiu Díli, Superintendente Xefe Polísia Orlando Gomes, informa, evidénsia hirak ne’e Polísia prende iha Segunda  kalan (20/05/2024), bainhira na’in bá motorizada hirak ne’e bá estasiona hela motór iha troatoar letenv tama bá partisipa iha feira nasionál ne’ebé organiza hosi Ministériu Komérsiu no Indústria (MCI) iha ámbitu komemorasaun loron nasionál Restaurasaun Independénsia RDTL bá dala-XXII (20 Maiu 2002 to’o 20 Maiu 2024) iha Portu antigu Díli.

Alende estasiona iha trotoar leten, maibé mós evidénsia balu mak na’in la instala asesóres motór nian hanesan, espellu ho lampu. Tanba ne’e maka polísia tenke foti medida hasoru infratór sira tuir Lei Númeru 03/2006, kona-bá Kódigu Estrada nian.

“Durante feira ne’e ita nian tránzitu sira konsege prende motorizada hamutuk 23, ne’ebé mak sira balu para iha Zebra Cross, balu la uza espellu, balu mós lampu oin laiha no ida ne’e mak ita nian tránzitu sira prende no lori mai iha komandu para nune’e bele fó sansaun bá sira,” Komandante Orlando Gomes, informa bá jornalista sira iha kna’ar fatin, Caicoli-Dili, Tersa (21/05/2024).

Komandante Díli ne’e salienta katak, durante komemorasaun loron independénsia RDTL bá dala-22 no vizita Sua Majestade Sultan Haji Hassnal Bolkiah Mu’izzuddin Waddaulah, Brunei Darussalam nian iha Dili, laiha asidente no insidente ruma mak akontese, tanba Komandu Dili hetan apoiu hosi Unidade Espesiál Polisia (UEP), Unidade Patrullamentu Fronteira (UPF), Unidade Polísia Marítima (UPM), inklui ekipa Servisu Sekreta sira, koloka hotu iha fatin risku sira iha área kapitál Dili.

Jornalista: Rogério Pereira Cárceres