Hatutan.com, (29 Maiu 2024), Díli– Sorumutuk Konsellu Ministru sira-nian, Kuarta (29/05/2024), iha Palásiu Governu, aprova  projetu dekretu-lei ida kona-bá estabelesimentu estatutu foun  Polísia Nasionál Timor-Leste (PNTL).

Lee Mós: KM Aprova Projetu Dekretu-Lei Estabelesimentu Gabinete Fronteira Terrestre-Marítima

Serimónia aniversáriu PNTL iha Bairru-Pité Díli, Kuarta (27/03/2024). Foto/dok. Elio dos Santos da Costa.

Iha komunikadu imprénsa ne’ebé Hatutan.com asesu relata projetu Dekretu-Lei ne’e aprezenta husi Ministru Interiór, Francisco da Costa Guterres, ho objetivu atu estabelese Estatutu foun Polísiál nian husi Polísia Nasionál Timor-Leste (PNTL).

Polísia sira-nia estatutu foun ida-ne’e ho objetivu atu hadi’a regulamentu atuál ho introdusaun mudansa signifikativa sira, maka hanesan introdús fila-fali juramentu fidelidade, define inkompatibilidade no kritériu objetivu sira ba promosaun. Estabelese mós postu foun lideransa nian iha PNTL atu hatán ba nesesidade organizasionál.

“Diploma ida-ne’e reflete importánsia atu garante polísia nasionál ida ne’ebé profisionál, bein treinada no estruturada, ho objetivu atu hametin Estadu Direitu no promove demokrasia iha territóriu nasionál,” sita iha komunikadu ne’e.

Konsellu Ministru sira-nia  aprova mós projetu Dekretu-Lei ida ne’ebé aprezenta mós hosi Ministru Interiór, Francisco da Costa Guterres ho intensaun atu estabelese Orgánika Foun PNTL nian, ho objetivu atu reestrutura no moderniza instituisaun ne’e, atu nune’e, hasa’e ninia kapasidade resposta ba dezafiu nasionál ohin loron nian, ne’ebé aliña ho planu estratéjiku dezenvolvimentu no seguransa nasionál.

Iha sorumutu Konsellu Ministrus ne’e hala’o ona dezignasaun membrus Konsellu Administrasaun Sentru Nasionál Chega! I. P., husi Memória ba Esperansa, hodi ezerse mandatu ba tinan tolu, tanba fatin hirak-ne’e sei mamuk hela.

Konsellu Ministrus, liuhusi proposta Vise-Ministru Asuntu Parlamentár ne’ebé substitui Ministru Prezidénsia Konsellu Ministru sira-nian delibera hodi dezigna Aniceto Guro-Bertini nu’udár membru no Manuel Mesquita, nu’udar Prezidente Konsellu Administrasaun.

Jornalista: Rogério Pereira Cárceres