Hatutan.com, (19 Juñu 2024), Díli-Polisia Nasional Timor-Leste (PNTL) Munisípiu Dili, iha Kuarta dadeer (19/06/2024), prende motór hamutuk 10 no karreta  ida (1) husi adeptu sira selesaun Portugál nian tanba halo konvoiu  iha Díli hodi fó sira-nia apoiu bá selesaun  Portugal iha ámbitu kopa Europeia 2024.

Motór sira ne’ebé Polísia prende husi adeptu selesaun Potrugal bianhira hlao konvoiu iha Dili laran, Kuarta dadeer (19/06/2024). Foto/Elio dos Santos da Costa

Komandante Munisípiu Díli, Superintendente Xefe Polísia Orlando Gomes informa, atuasaun PNTL nian hodi halo apreensaun bá evidénsia sira ne’e tanba hetan orientasaun hosi komandante jerál PNTL, Komisáriu Polísia Henrique da Costa, ne’ebé husu atu halo operasaun iha kapitál nasaun ne’e nian, hodi kontrola atividade komvoi ne’ebé hala’o hosi adeptu nasaun Portugal ho Ceko nian.

“Iha jogus entre Portugal ho Ceko, ne’ebé komandu munisípiu Dili simu orientasoens hosi sua-exelénsia komandante jeral para atu halo operasaun bá horkalan to’o madrugada ninian. Ita halo operasaun bá adeptu sira ne’ebé maka halo konvoiu kontra regra, kontra sinais tránzitu ninian,” Komandante Polísia Munisípiu Díli, Orlando Gomes informa bá Jornalista sira iha kna’ar fatin, Caicoli-Díli, Kuarta (19/06/2024).

Evidénsia hirak ne’ebé prende, oras ne’e asegura hela iha resintu komandu PNTL Munisípiu Dili nian hodi prosesa tuir lei kódigu estrada nian, liu-liu aplika multa bá infratór sira tuir grau infrasaun, selu iha bandu, molok foti fila sira ninian motor no kareta sira ne’e.

Iha jogu Kopa Europeia entre nasaun Portugal ho Ceko ne’e, akontese iha tuku-haat madrugada, no rezultadu Portugal manán Ceko  2-1.

Jornalista: Rogério Pereira Cárceres