Hatutan.com, (22 Juñu 2024), Díli– Mintru Justisa Sérgio de Jesus Fernandes da Costa Hornai  seidauk simu dokumentu ofisial kona-bá desizaun final Tribunál Supremu Justisa  (TSJ) ka Tribunál Rekursu (TR)  liberta total fujitivu ho nasionalidade Filipina, Arnolfo “Anie” Alipit Teves Junior (Jr).

Lee Mós: Tribunal Rekursu Liberta Fujitivu Arnolfo Teves Jr

Fujitivu Arnolfo “Anie” Alipit Teves Jr. Foto/Foti husi GMA News Online

Bá jornalista sira bainhira partisipa serimónia dedikasaun naran martir sira-nian bá repetidór no Branching Unit iha Kabu Submarinu  ne’ebé hala’o Sábadu (22/06/2024), iha Portu Díli, Ministru Sérgio Hornai hatetne nia parte  seidauk halo leitura ida kompletu bá iha desizaun Tribunál Rekursu nian, maibé nia simu informasaun ruma bá ida-ne’e no nia  preferénsia di’ak liu  rona parte hotu-hotu mak  halo leitura kompletu bá iha desizaun ida-ne’e, ho nune’e nia bele halo pronúnsiasaun relasion kazu fujitivu Arnolfo Teves Jr nian.

’’Ita mós halo ona kontaktu balun, ita nian belun Arnolfo Teves Jr ne’ebé momentu ne’e  iha ita nian rejiaun ka ita nia teritóriu. Ita-boot sira dehan iha ona desizaun, maibé tanba ha’u seidauk iha dokumentu ofisiál hanesan membru Governu ne’ebé tutela bá responsavél bá materia ida-ne’e ha’u seidauk bele halo pronunsiasaun bá ida-ne’e,’’ Ministru Justisa  Sérgio de Jesus Fernandes da Costa Hornai hateten.

Tuir Konstituisaun RDTL artigu 35 hateten momós katák bainhira halo estradisaun tenke desizaun husi judisiáriu ida. Tanba ne’e, Ministru Justisa ne’e hein bá desizaun Tribunál  nian pois Governu halo  pronúnsiasaun ofisiál hanesan Estadu nian hanesan Governu nian bá iha situsaun konkreta ida-ne’e.

Buat ne’ebé Ministru Sérgio Hornai hatene mak dauduan ne’e  fujitivu Arnolfo Teves Jr iha hela detensaun provisória prizaun domisiliaria iha ninian residénsia nune’e hodi hein kona-bá desizaun defenitiva.

’’Tanba ita-boot sira hatene katak ita iha prazu atu halo prosesu sira tuir tramite ita-nia lei prosesuál ninian. Konstituisaun Repúblika tuir ita nia lei koopersaun internsionál penál nian hateten katák tenke respeitu bá iha desizaun ne’ebé mai husi orgaun tribunál ninian. Maibé, hanesan Governante iha Governasaun nian iha ona desizaun propriu bá desizaun ida-ne’e ita hotu-hotu hein para desizaun ida-ne’e di’ak bá ita nian paíz no mós bá relasaun servisu entre Timor-Leste ho Filipina rasik no mós  bá situsaun atuál ida-ne’e liuliu ita-nia adezaun bá ASEAN,” Sérgio Hornai hateten.

Tuir nia liberta  kazu fujitivu Arnolfo Teves Jr, ne’e kompeténsia Tribunál no Ministériu Públiku sei uza nia kompeténsia tomak atu reprezenta Estadu  asegura legalidade kona-bá desizaun ne’ebé Ministeriu Públiku nu’udár reprezentante Governu hanesan materia bá  penal ninian.

“Ha’u hanesan ministru ha’u tenke halo koopersaun ho instituusaun relevante bá problema boot ne’ebé ita enfrenta,” Nia subliña.

Jornalista Estajiária: Zita Menezes