Hatutan.com, (06 Jullu 2024), Díli- Timor-Leste ho  Mozambique asina ona memorandu entendimentu iha área importante tolu, hanesan estabelesimentu mekanizmu permanente ba konsulta polítika diplomátika, ba ensinu superior, siénsia no teknolojia nian, no ikus liu kona-bá esplorasaun mina no idrokarbonetu.

Lee Mós: PR Ramos-Horta Halo Vizita Ofisiál bá Mozambique ho Angola

PR José Ramos-Horta ho nia omólogu Prezidente Repúblika Mosambique, Filipe Jacinto Nyusi. Foto/Mídia MNEK

Ministru Negósius Estranjeirus no Kooperasaun (MNEK) Timor-Leste, Bendito dos Santos Freitas, reprezenta estadu Timor-Leste asina iha Sesta, 05 fulan-Jullu 2024, Memorandu Entendimentu ho Governu Mozambique  hodi estabelese kooperasaun iha área importante tolu inklui iha esplorasaun ba mina no gás (Hidrokarbonetus no Mina).

Haktuir iha komunikadu imprensa ne’ebé Hatutan.com asesu husi Gabinete Média MNEK, Sábadu (06/07/2024) informa akordu ne’e asina ho Ministra Negósius Estranjeirus no Kooperasaun Mozambique, Verônia Mocamo, hafoin remata enkontru bilateral entre Prezidente Repúblika Timor-Leste, José Ramos-Horta ho delegasaun ho Xefe Estadu Mosambike, Filipe Jacinto Nyusi, iha Palásiu Prezidensiál, iha ámbitu vizita ofisiál Prezidente Repúblika, José Ramos-Horta nian ba refere.

“Memorandu entendimentu tolu ne’ebé ohin  asina ho Mozambique ne’e primeiru kona-ba estabelesimentu mekanizmu permanente ba konsulta polítika diplomátika, ida-ne’e téknikamente atu bele halo diskusaun. Tuir fali mak  kona-ba ensinu superior, siénsia no teknolojia nian, no ida ikus liu mak memorandu entendimentu ba esplorasaun mina no hidrokarbonetus,” Ministru Bendito dos Santos Freitas hateten iha komunikadu ba Imprensa ne’bé Hatutan.com asesu.

Governante ne’e haktuir tan, Prezidente Repúblika Mozambique mós husu Timor-Leste atu fahe esperiénsia ba sira kona-ba jestaun fundu soberanu ka fundu petrolíferu.

“Sira husi Mosambike mós husu atu bele haree esperiénsia ita-nia kona-ba jestaun fundu soberanu. Ita kona-ba indústria estrativas ne’e avandu ona, tanba ne’e mak sira hein husi ita atu aprende ba setór ida-ne’e, espera katak, ekipa téknika bele mai par aserta,” tenik Bendito dos Santos Freitas.

Asuntu seluk ne’ebé ko’alia mós mak iha área edukasaun, saúde, agrikultura, dezenvolvimentu kapital umanu inklui kooperasaun multilateral iha nível Nasoens Unidas no organizmu multilateral sira seluk ne’ebé Timor-Leste ho Mozambique  bele tulun malu.

Prezidente Ramos-Horta mós husu Mozambique ne’ebé hanesan nasaun dahat iha organizasaun Cumunidade dos Países da Língua Portuguesa (CPLP) alende ne’e Portugal, Brazil no Angola, inklui mós nasaun membru CPLP sira seluk, atu loke harii Embaixada iha Timor-Leste, nune’e bele konsolida liután relasaun no kooperasaun entre estadu membru sira.

Sorumutuk ne’e, Xefe Estadu, José Ramos-Horta, akompañadu husi Ministru Negósius Estrajeirus no Kooperasaun, Bendito Freitas, Embaixadór Timor-Leste ba Mozambique, Luís Miguel de Sousa Siqueira no seluk tan.

Jornalista: Vito Salvadór