Hatutan.com, (03 Outubru 2024), Díli- Reprezentante Santa Sé mai Timor-Leste Mgr. Marco Sprizzi, hodi Santa Sé nia naran no Irarkia Igreja Katólika Roma agradese povu Timor-Leste ne’ebé ho domin no maturidade mantein situasaun hakmatek no pasífiku durante vizita Papa Francisco ho susesu no sai orgullu ida ba mundu tomak.

Lee Mós: Agradese bá Igreja ho Governu bá Susesu Vizita Papa Francisco iha Timor-Leste

Sarani Timoroan rihun 700 hola parte iha misa solene ne’ebé prezide husi Papa Francisco iha Tasi-tolu, Díli, 10 Setembru 2024. Foto/Tome da Silva

Reprezentante Santa Sé ba Timor-Leste Mgr. Marco Sprizzi hato’o deklarasaun ne’e hafoin hasoru-malu ho Prezidente Repúblika José Ramos-Horta iha Palásiu Prezidensiál Nicolau Lobato, Díli, Kinta (03/10/2024).

“Sorumutu ida ho Prezidente Repúblika José Ramos-Horta hodi avalia hamutuk kona-bá vizita Papa Francisco nian mai Timor-Leste ne’ebé nu’udár ksolok no susesu, grasa no bensaun ne’ebé extraordináriu ba Timoroan hotu,” Mgr. Marco Sprizi hateten.

Vizita Apostóliku Papa Francisco nian ne’e sai mós hanesan espetakulasaun bo’ot ida ba mundu tomak, hanesan Prezidente Repúblika haktuir katak nia belun sira barak iha mundu liu-liu husi Estadus Unidus Amérika,  Brazil, no Europa tomak, hotu-hotu akompaña no haree imajen no vídeo sira kona-ba oinsá povu Timor-Leste nia maturidade ho kapasidade organiza eventu boot ida-ne’e ho mobilizasaun povu-sarani iha istória Timor-Leste nian.

Mgr. Marco Sprizi subliña ho situasaun mai agradese ba Maromak, ba povu, ba Papa Francisco, ba Governu no Estadu Timor-Leste, maibé liu-liu ba povu Timor-Leste ne’ebé hatudu maturidade,  pasifika, entuziazmu ho fiar ne’ebé sai nu’udár roman ba iha Asia no mundu tomak.

“Ha’u hanesan reprezentante Papa sente kontente loos tanba ho servisu sira preparasaun nian kuaze tinan ida tomak, ho kolaborasaun entre Igreja lokál ho Governu Timor-Leste  hatudu rezultadu ida kmanek no bo’ot tebes liu tiha saida mak ema hotu hanoin,” nia tenik.

Rezultadu no susesu ne’ebé iha hatudu buat balun ne’ebé la perfeitu ka iha naksalak oan ruma, ida-ne’e atu konfirma katak iha rai ne’e buat hotu la perfeitu no ida perfeitu liu ne’e iha de’it Lalehan.

Papa Francisco halo vizita pastoral no vizita Estadu nian mai Timor-Leste durante loron tolu; hahú iha loron 09 to’o loron 11 fulan-Setembru 2024. 

Jornalista: Vito Salvadór