Hatutan.com, (20 Novembru 2024), Díli- Prezidente Repúblika, José Ramos-Horta, admite labarik halo negósiu, importante saúde diak no badinas ba eskola.

Lee Mós: Ramos-Horta Sei Konsulta Ho Jurista Molok Promulga Lei Protesaun Labarik

Prezidente Repúblika José Ramos-Horta hato’o deklarasaun ne’e relasiona ho selebrasaun loron mundial ba labarik no atu hatan ba preokupasaun sira ne’ebé públiku sira sempre kestióna kona-bá envolvimentu labarik iha atividade negósiu iha estrada ninin iha kapitál Díli no munisípiu sira seluk.

Labarik ida fa’an hela manu-tolu iha estrada públiku. Foto/Dok. Hatutan.com

“Loron mundiál ba labarik sira, se labarik sira fa’an de’it sasán hanesan fa’an manu-tolu, fa’an hudi-sona , balun komesa fa’an hahán tula ba karreta sira ladún todan, ha’u la preokupa ho ida-ne’e, tanba primeiru sira ba hela eskola, bainhira eskola remata lokraik sira ajuda sira-nia família ba fa’an. Barak liu labarik sira husi Oé-Cusse, ha’u sempre sosa sira nia manu-tolu lubuk ida loos, ne’e-duni ha’u la preokupa ho ida-ne’e, preokupa liu ho problema ne’ebé boot liu, sub-nutrisaun infantil,” Prezidente Repúblika José Ramos-Horta ba jornalista sira iha Ótel Novu Turizmu, Kuarta (20/11/2024).

Xefe Estadu subliña lolos ne’e ema hotu tenke preokupa mak labarik sira hahán laiha, hahán la sufisiente, kosok-oan moris mai ne’e laiha nutrisaun entaun isin ladún dezenvolve ne’e mak tenke sai preokupasaun, duké labarik oan sira fa’an iha estrada públiku, tanba ema la halo violénsia ba sira.

Balun bele todan liu tan sira ba servisu Mota Comoro, kee rai-henek depois fa’an ne’e mak bele todan iha loron manas, mas Ramos-Horta dehan nia liu husi ne’ebá hateke ba  haree labarik  ladún barak suru rai-henek iha moto Comoro.

INDDICA tenke apoiu Governu ba problema má-nutrisaun ba labarik

Prezidente Repúblika José Ramos-Horta mós hateten Institutu Defeza ba Diretu Labarik (INDDICA, sigla portugés) la’ós atu hare de’it kona-bá traballu infantíl, maibé tulun governu haree mós problema sira má-nutrisaun nian ba labarik sira.

“Ha’u la haree INDDICA nia servisu durante ne’e, bele halo karik, ha’u mós labele marka prezensa iha fatin hotu-hotu, maibé realidade mak ne’e loro-loron iha Timor-Leste tomak iha labarik barak bele han de’it dala ida ka dala rua, la han dala tolu. Dala ida sira han ne’e han saida, barak han de’it ai-fariña, han de’it fehuk, batar, foos mas laiha liu nutrisaun ne’e barak tebe-tebes,” Prezidente Repúblika José Ramos-Horta hateten.

Atu rezolve problema ne’e governu halo merenda eskolár, merenda eskolár fatin fallansu boot tanba jestaun la di’ak, tanba korrupsaun tanba mal funsionamentu sistema dijitalizasaun.

Dalen ruma la’ós korrupsaun eskola iha aldeia ida ne’e kiak tebe-tebes, eskola ne’e sosa hahan tein ba labarik han mós laiha, ha’u haree ho ha’u nia matan, dala ida ha’u haree almoco iha fatin ida besik Kribas ne’ebá te’in koto ne’e hanesan tau bee de’it laiha tan buat seluk.

Tanba fatin eskola ne’e do’ok husi Kribas la’o de’it oras lima, estrada at tiha governu laiha hadia, problema merenda eskolár enfrenta dezafiu barak.

“Primeiru Ministru hatete ba ha’u iha preokupasaun boot atu haree oinsá hadi’a merenda eskolár ne’e di’ak governu tau osan uitoan tan. Maibé tenke haree mós fornesimentu bee, ai-fuan, tenke aumenta mós investimentu estrada ba zona rurál ba eskola, hadi’a eskola sira, hadi’a sintina eskola nian,” Horta hateten.

Jornalista: Vito Salvadór