Hatutan.com, (14 Dezembru 2024), Díli-Polisia Nasionál Timor-Leste (PNTL) liuhosi Departamentu Investigasaun Kriminál (DIK) Nasionál, Sesta (13/12/2024), hale’u tuku 15:50 Otl,  detein ona sidadaun estranjeira na’in-tolu iha sela detensaun tanba deskonfia envolve iha rede tráfiku umanu no hala’o hela atividade hirak ne’e iha Díli, Timor-Leste.

Lee Mós: PN Husu Governu Kombate Tráfiku Umanu Ne’ebé Involve Traballadór Timor-oan iha Estranjeiru

Autoridade Polísia ihalo identifikasaun ba sidadaun estranjeira na’in-tolu ho nasionalidade Indonézia ne’ebé deskunfia envolve iha rede trafiku umanu. Foto/Rogério Pereira Cárcerese

Haktuir iha mandadu Tribunál nian ne’ebé Hatutan.com asesu, fó sai katak, sidadaun na’in-tolu ho nasionalidade estranjeiru ho insiál RSA, MS ho MNW durante estadia iha Díli, sira hela iha otél ida iha área Suku Bairo Pite, Postu Administrativu Dom Aleixo, Munisípiu Díli.

Estranjeira na’in-tolu ne’e, ekipa DIK Nasionál kaptura  iha fatin diferente, hanesan na’in-da iha Club 03 no na’in-rua seluk kaptura iha  Delta-01, Comoro nian.

Medida atuasaun hirak ne’ebé Ekipa Departementu Investigasaun Kriminal ezekuta ho baze bá mandadu-detensaun no buska apreensaun hosi Tribunál Judisial Primeira Instánsia Dili (TJPID), NUC : 0298/24.PNSIC.

Hafoin kapturasaun, ekipa operasaun iha terrenu transporta kedas autór sira ne’e bá iha edifísiu Departementu Investigasaun Kriminal iha Kuartel Jerál PNTL, Caicoli, hodi halo sertifikasaun, no lori bá detein sela detensaun Komandu PNTL Munisípiu Díli durante oras 72 nia laran, hafoin submete bá prosesu primeiru interrogatóriu judisial iha  TJPID.

Kríme ne’ebé maka parte kompetente imputa ba suspeita sira mak  konsta iha Artigu 163 Kodigu-Penal, kona-bá “Tráfiku ho Ema”:

1. Ema ne’ebé rekruta, aliena, sede, adkire, transporta, transfere, aloja ka akolle ema ruma, ho ameasa, forsa ka koasaun oin seluk tán, ho raptu, ho fraude, ho enganu, tanba abuza nia autoridade ka abuza ema ne’e nia situasaun vulnerável, ka tanba entrega ka simu pagamentuka benefísiu ruma hodi hetan konsentimentu hosi ema ne’ebé iha autoridade bá ema seluk, hodi hetan esplorasaun nia objetivu, sei hetan pena prizaun tinan 8 to’o tinan 20.
2. Sei hetan pena previstu iha númeru anterior ema ne’ebé rekruta, transporta, transfere, aloja ka akolle ema ho tinan ki’ik liu 17 hodi esplorasaun, maske la envolve meiu referidu iha númeru anteriór.
3. Atu aplika artigu ida-ne’e nia dispozisaun, esplorasaun tenke inklui, pelu-menus, esplorasaun bá ema seluk nia prostituisaun ka esplorasaun seksuál seluk tán, traballu ka servisu forsadu, eskravidaun (halo sai atan) ka prátika besik hanesan ho eskravidaun ka estrasaun bá órgaun.
4. Vítima nia konsentimentu laiha relevánsia, kuandu ajente uza meiu ruma referidu iha númeru 1.  

  Jornalista: Rogério Pereira Cárceres