Hatutan.com, (16 Janeiru 2025), Díli– Ministru Asuntu Kombatente no Libertasaun Nasionál (MACLN, sigla portugés), Gil da Costa Monteiro “Oan Soru” husu   públiku atu submete  reklamasaun ho  evidénsia bá lista veteranu ne’ebé rejista iha tinan 2009 ne’ebé fó sai ona validasaun iha Kuarta, 15 fulan-Janeiru 2025.

Lee Mós: CCLN Sei Foti Medida Hasoru Veteranu Falsu

Komunidade Aileu hakbesik ba haree lista naran veteranu nian ne’ebé taka iha kuadru avizu sira. Foto/Tome da Silva

“Lei iha ne’ebá klaru hela atu halo reklamasaun hasoru ema ne’ebé la merese. Reklamasaun hatama mai para hodi hasai tiha,” Ministru Gil da Costa Monteiro “Oan Soru” bá Jornalista sira iha Edifísiu MACLN, Kinta (16/01/2025).

Ministru MACLN ne’e afirma la signifika lista ne’ebé taka iha ne’ebá ne’e definitivu, tanba lei mak haruka, MACLN  bele kumpre de’it nia devér administrativamente hasai juridikamente bá lei.

“Halo reklamasaun maibé tenke ho evidénsia. Labele tanba ódiu malu tanba partidu hadau malu feto-mane, ne’e regra sé nian halo reklamasaun mak la bazeia bá evidénsia  ne’e labele,” Nia tenik.

MACLN taka sai lista ne’e para hetan reklamasaun, mais halo protestu iha média sosiál tau tuun tau sáe ne’e la konta tenke halo reklamasaun halo ho eskrita tanba formatu reklamasaun nian iha munisípiu iha hotu ona.

“Idade iha ne’ebá ko’alia mais la halo lakon mós labarik ki’ik ida  ka rua ne’ebé mak iha tempu ne’ebá partisipa, maibé tenke iha responsavel sira ne’ebé mak sai testemuña loloos,” Hateten Ministru Gil Oan Soru hateten.

Bainhira kombatente ka públiku hatama reklamasaun ka kontestasaun  ruma mai  mak sei haree tuir kontestasaun ne’ebé mak iha.

“Bá oin ne’e sira atu halo reklamasaun tuir formatu ne’ebé fó sai katak iha loron 60 nian laran ne’e  atu halo reklamasaun,” Nia tenik.

 Jornalista Estajiária: Zita Menezes