Hatutan.com, (18 Fevereiru 2025),  Baucau—Governu liuhosi Ministru Agrikultura, Pekuária, Peska no Floresta (MAPPF), entrega tratór liman unidade haat (4) ho fini hare nakroma kilograma  375  ba komunidade agrikultura Postu Administrativu Vemasse, Munisípiu Baucau.

Lee Mós: Prezidente Repúblika Vizita Irrigasaun Galata Ne’ebé Fornese Bee Ba Natar Ektare 600

Ministru MAPPF, Marcos da Cruz, akompaña hosi Prezidente Repúblika, José Ramos-Horta entrega tratór ho fini hare ba agrikultór sira iha Vemasse, Baucau, Segunda (17/02/2025). Foto/Lazaro Pereira Quefi

Prezidente Repúblika José Ramos -Horta ne’ebé partisipa direta iha serimónia ne’e hateten kada tinan Timor-Leste importa foos tonelada lubuk ida hosi rai-li’ur, liuliu Vietnam ho Tailándia tanba povu presiza foos no loron-loron konsume etu. Ne’e duni,  programa governu ne’ebé agora daudauk halo hanesan prioridade ida tau osan boot atu agrikultór sira bele fila ba natar no toos, maibé ho apoiu tékniku hosi governu hanesan estrada rural no Estrada nasionál tanba estrada importante ba komérsiu no ba agrikultór  sira atu bele hafasil agrikultór sira sa’e transporte lori  ba merkadu.

“Ohin, ha’u akompaña hodi haree entrega tratór no fini fó ba ita-boot sira atu tinan oin mai ita bele iha foos no iha natar sira nakonu ho ema badinas,” José Ramos-Horta hateten, Segunda (17/02/2025).

Ramos-Horta hatutan  Xina hanesan parseiru importante ba agrikultura Timor–Leste tanba sira hatene agrikultura Xina nia sivilizasaun dezde tinan rihun ba rihun mak agrikultura ne’e duni iha fatin barak sira apoiu ho orden instrusaun.

Ramos-Horta informa nia  hasoru ona prezidente Xina, Xi Jinping, iha fulan-Juñu 2024 atu apoiu Timor-Leste hodi hetan hahán soberania tanba independénsia ba soberania  la iha hahán entaun independénsia ne’e la vale buat ida.

Iha fatin hanesan Ministru Agrikultura, Pekuária, Peska no Floresta (MAPPF), Marcos da Cruz hateten, dezenvolvimentu agrikultura ne’e importante tanba Timor-Leste maioria moris ho agrikultura tanba ne’e komunidade iha Postu Administrativu  Vemasse badinas atu natar sira presiza funsiona  maibé mós presiza fasilita ho mákina sira ne’e inklui fini.

“Iha tinan uluk, rai sira ne’e se abandona tanba ne’e mak ami buka oinsá mak atu bele reativa fali rai  abandona sira ne’e,” Marcos da Cruz hateten.

Marcos da Cruz husu ba komunidade Vemasse atu apoiu ba liurai Postu Administrativu to’o nivel baze atu bele servisu hamutuk hodi hasae produsaun iha área Vemasse ne’e rasik.

Iha fatin hanesan Prezidente Autoridade Munisipiu Baucau, Veneranda Lemos  hato’o agradesimentu ba MAPPF ninia servisu hodi tau-matan ba setór agrikultura, setor produtivu ho di’ak tebes hahú kedas iha tinan kotuk to’o tinan ida-ne’e, iha oras ida ne’e maske seidauk total maibé komunidade iha Munisípiu Baucau komesa sente daudauk ona katak bee tama ona ba natar sira no mós iha tratór.

“Ami iha Baucau enkoraja maluk sira ne’ebe servisu iha natar ami hateten katak sira mak tenke sai primeira liña atu aban bairua bele hamenus importasaun foos. Tanba ita komesa ona hadi’a irrigasaun sira,” Veneranda Lemos hateten.

PAM Baucau husu ba MAPPF atu bele tau nafatin atensaun liuliu ba irrigasaun sira ne’ebe ho ninia nivel boot uitoan no mós fasilita tan material sira seluk hanesan tratór boot no ki’ik tanba ne’e husu nafatin ba MAPPF atu halo manutensaun ba tratór boot sira ne’ebe uluk iha tiha ona agora avaria hela halo hodi bele atende ba natar sira ne’e mak boot iha área produtiva sira.

Jornalista Estajiáriu: Lazaro Pereira Quefi