Hatuan.com, (03 April 2025), Díli– Institutu Camões Portugál apoiu orsamentu ho montante $140,000 hodi reabilita sala hitu (7) iha Eskola Bázika Sentrál Nú. I Faról, Díli.

Lee Mós: Komisaun G-PN Identifika Eskola Balu iha Munisípiu Menus Profesór

Prezidente Repúblika (PR), José Ramos-Horta ho Embaixadora Portugal mai Timor-Leste, Maria Manuela Freitas Bairos ho Ministra Edukasaun, Dulce de Jesus foto hamutuk ho estudante sira EBC Faról, Díli, Kinta (03/04/2025). Foto/Tome da Silva

Ho baze ba apoiu ida-ne’e, Kinta (03/04/2025), parte sira liuliu Institutu Camões ho Ministériu Edukasaun Timor-Leste asina ona akordu kooperasaun ne’ebé asiste direta husi Prezidente Repúblika (PR), José Ramos-Horta ho Embaixadora Portugal mai Timor-Leste, Maria Manuela Freitas Bairos.

Prezidente Repúblika (PR), José Ramos-Horta hateten setór edukasaun sempre importante teb-tebes no sempre komplikadu iha rai barak, tanba ne’e tenke esforsu no apoiu para hadi’a setór edukasaun hodi benefisia joven no labarik sira.

Ministra Edukasaun (ME), Dulce de Jesus Soares orgullu tanba bele hetan tulun hosi Governu Portugál liuhosi Institutu Camões iha Timor-Leste.

“Ita mós lori estudante Timorense sira, profesór sira hotu agradese ba institutu Camões liuhosi Embaixada Portugál nian iha ne’e, ne’ebé mak fó apoiu ba ita hodi halo rehabilitasaun ba sala aula hitu  iha  Eskola Faról,”  Ministra Edukasaun Dulce de Jesus hateten.

Ministra Edukasaun Timor-Leste ne’e informa, apoiu sira-ne’e bele hamenus liután problema iha setór edukasaun tanba ba infraestrutura eskola iha territóriu Timor-Leste presiza  sala ba aula nian hamutuk 1,900 no Governu ida-ne’e kompromete sei reabilita sala ba aula eskola sira-nian iha territóriu.

Jornalista: Tome da Silva