Hatutan.com, (09 Abríl 2025), Díli– Prezidente Repúblika (PR), José Ramos-Horta husu Governu da-9 ne’ebé lidera husi Primeiru-Ministru Kay Rala Xanana Gusmão atu halo uluk kompensasaun ne’ebé justu ba komunidade sira ne’ebé afetadu ba eviksaun.

Lee Mós: Eviksaun, Governu Nia Aproximasaun La Proporsionál no La Bazeia Bá Planu Urbana

PM Xanana Gusmão enkontru ho PR José Ramos-Horta iha Palásiu Prezidensiál, Kinta (13/02/2025). Foto/Dok.Elio dos Santos da Costa

“Se rai privadu tenke iha kompensasaun ne’ebé justu, liu-liu ema sira ne’ebé kiak ne’e, ema sira kiak ne’e, o fó kompensasaun ne’ebé di’ak liu uitoan para hadi’a sira nia vida, se privadu dunik tenke selu, liu-liu tanba Timor-oan osan ladún barak di’ak liu haree kompensasaun didi’ak para ajuda sira,”  Prezidente Repúblika (PR), José Ramos-Horta hateten ba Jornalista sira hafoin partisipa iha Konferénsia Akadémika ” Reflexão Nacional Sobre 50 Aniversario da Proclamação da Independência de Timor-Leste”, iha salaun Auditoria UNTL, Díli, Kuarta (09/04/2025).

Xefe Estadu haktuir, “agora raiEestadu balu okupa tiha, agora ami mós hakarak kompensasaun, ita bo’ot uluk hatene rai ne’e Estadu nian, ita okupa tiha, hela gratis loos, kontente loos tinan 30 nia laran, agora hakarak tan kompensasaun, ita bele halo komprensaun ba Estadu tanba hela tinan 20 la selu buat ida.”

Ramos-Horta mós konfirma katak  to’o agora seidauk iha informasaun ruma husi Ministériu Públiku kona-bá keixa ne’ebé hasoru SEATOU.

“Ha’u nia keixa mak ne’e de’it ha’u la’ós kontra evakuasaun, ha’u kontra de’it primeiru laiha diálogu sufisiente, la iha akordu sufisiente para muda ema sira ne’e. Lori fali PNTL, Polisia Militár depois balu kuitadu sira fan modo iha trotoár sira ne’e baku sira, tebe meza sira ne’e,” Ramos-Horta hateten.

Antes ne’e, Primeiru Ministru (PM), Kay Rala Xanana Gusmão, tun direita iha terrenu hodi diskute malu ho na’in ba rai iha área Becora Díli, tanba na’in ba rai lakohi fó espasu ba Governu atu haluan estrada tanba sira konsidera Governu manobra sira iha prosesu alargamentu estrasda husi Kulu-hun to’o Fatu-ahi.

Jornalista: Tome da Silva