Hatutan.com, (06 Juñu 2025), Díli– Meskita An-nur, Kampu Alor, Díli, sai hanesan opsaun ida ba musulmanu sira ne’ebé horaik iha sidade Díli hodi hala’o orasaun Eid al-Adha 1446H  iha tinan 2025.

Lee Mós: Idul Adha Fó-Hanoin Kona-bá Identidade, Espíritu Unidade no Toleránsia Relijiozu

Musulmanu sira halibur malu iha Meskita An-nur hodi selebra loron boot Idil Adha, Sesta (06/06/2025). Foto/Zita Menezes

Nur Rahman Hakin nu’udár iman sholat Idul Adha ho khotib tinan ida-ne’e iha Meskita  An-nur hateten, selebrasaun loron Idul Adha ne’e musulmanu sira hala’o ho ksolok boot tanba sente duni sentidu toleránsia relijiaun iha Timor-Leste la’o ho di’ak loos.

“Loron Idul Adha  signifika mós  loron  sakrifisiu (kurban)   ne’ebé Profeta Ibrahim oferese nian agradesimentu  bá Maromak ho bibi-oan nu’udár símbolu hasa’e agradese  ba Maromak, tán ne’e kada tinan Musulmanu sira sempre halo tuir fiar ida-ne’e, Nur Rahman Hakin  esplika, Sesta (06/06/2025).

Iha sorin seluk musulmanu Muhalil Monteiro ne’ebé partisipa iha  selebrasaun loron  Idul Adha iha Meskita An-nur  hateten selebrasaun ne’e di’ak tebes, hanesan mós tinan kotuk no tinan sira liubá, musulmanu iha Timor-Leste halibur hamutuk hotu iha Meskita An-nur hodi selebra loron boot Idul Adha.

Tuir fiar Musulmanu sira-nian tinan ida selebra loron boot dala-rua, mak loron Idul Fitri no loron Idul Adha, depois ida-ne’e sei ko’a karau ho bibi ne’ebé bolu sakrifisiu (kurban)  hodi fahe bá ema ne’ebé iha direitu atu simu.

“Liuhosi selebrasaun loron idul Adah ami bele hakbesik aan liubá Aman Maromak hodi mantein nafatin ami nia fiar bá ami nian relijiaun no fiar katák ho loron boot ida-ne’e Nai Maromak fó bensan bá ami ho ami nia orasaun ne’ebé metin nafatin,” Muhalil Monteiro hateten.

Iha selebrasaun Idul Adha tinan ida-ne’e   musulmanu iha Meskita An-nur oho karau lima (5) no bibi (5) hodi fahe ba malu no mós bá viziñu sira hosi relijiaun seluk ne’ebé hela besik iha área Meskita An-nur.

Jornalista : Zita Menezes