Hatutan.com, (03 Jullu 2025) Díli–  Autoridade Polísia Nasionál Timor-Leste  (PNTL) husu ba inan-aman hotu atu kontrola movimentu oan sira-nian, nune’e evita oan sira monu ba ransu livre no tentasaun prostituisaun infantíl ka esplorasaun seksuál.

Lee Mós: Parlamentu Nasionál Husu PNSIK Halo Investigasaun Kle’an Bá Kazu Prostituisaun Infantil

Iha Segunda kalan (30/06/2025), Autoridade Polísia Nasionál Timor-Leste (PNTL) ho ekipa Servisu Migrasaun, asegura menoridade na’in-neen ne’ebé deskonfia otél balun esplora ba atividade prostituisaun infantíl.

 Menoridade na’in-ida husi sira na’in-neen ne’ebé Polísia asegura  tanba envolve iha prostituisaun infantíl. Foto/PNTL

“Kazu esplorsaun seksuál minoridade ne’ebé ita nia operasaun hetan no asegura ne’e maioria sira estudante iha nivél pre-sekundariu no sekundariu, tanba ne’e polísia halo investigasaun no  bolu inan-aman husi labarik nain-neen ne’e, inklui kanaliza informasaun ne’e ba iha Ministériu Edukasaun atu fó atensaun ba labarik idade eskola sira ne’ebé dala-ruma la ativa iha aula eskola mas ba halibur malu iha li’ur to’o ema balun aproveita sira iha esplorasaun seksuál,” Diretor Diresaun Investigasaun Kriminál Nasionál (DIKN) Superintendente  Polísia João Belo dos Reis haktuir ba jornalista sira liuhosi konferénsia imprensa iha Sala Reauniaun Ministériu Interior, Díli, Kinta (03/07/2025).

Porta-vos PNTL Superintendente  Polísia João Belo dos Reis preokupa tanba  dalaruma oras eskola no oras servisu inan-aman sira-nian,  labarik sira la’o la iha informasaun ba inan-aman to’o balun la tama uma to’o kalan tuku 10:00 no tuku 11:00 kalan mós inan-aman lahatene tuir.

“Ita nota prostituisaun infantíl  no esplorsaun seksuál ba minoridade sira akontese iha fatin barak, imformasaun ita komesa rekolla, depois operasaun ne’e la’o ema barak komesa fó informasaun katak iha ne’e akontese,” Superintendente  Polísia João Belo dos Reis hateten.

Superintendente  Polisia João Belo sublinha kazu krime akontese la haree ba se nia oan no tanba ne’e karik labarik ne’e minoridade presiza bolu nia inan-aman fó atensaun, maibé  karik mak idade tinan 18 ba leten ne’e responsavel individuu mós kontinua bolu inan-aman.

Operasaun hodi buka lokaliza no identifika fatin sira prostituisaun infantíl ne’e Polísia sei kontinua tanba ne’e violasaun boot ba Lei no konvensaun internasionál sira ne’ebé Estadu Timor-Leste retifika.

Jornalista: Juvinal Cabral dos Santos