Hatutan.com, (15 Jullu 2025)-Iha fulan-Agostu, tinan ne’e, komisaun juri rekrutamentu kadete foun Polísia Nasionál Timor-Leste (PNTL) hahú serbisu no publika konkursu públiku ba vaga 500  atu ne’e joven  Timor-oan sira bele kompete.

Lee Mós: Ministériu Interiór Sei Rekruta Membru Foun PNTL Na’in-500

Nesesidade ba pesoál ne’ebé atu rekruta ba PNTL iha tinan 2025 ne’e vaga hamutuk 500, ne’ebé vaga 400 ba konkursu públiku ba admisaun ba Kursu husiFormasaun ba Ajente sira, ba entrada tuir mai iha pozisaun Ofisiál Polísia Nasionál Timor-Leste, no vaga 100 ba konkursu públiku ba admisaun ba Kursu Formasaun ba Ofisiál sira, ba entrada tuirmai iha kargu Asistente Inspetór nian.

Ministru Interiór (MI), Francisco da Costa Guterres. Foto/Dok.

“Rekrutamentu ne’e ninia prosesu la’o ona no Rezolusaun Governu nú.9/2025, loron 12 fulan-Fevereiru, definisaun kona-bá nesesidade ba pesoál atu sai rekruta ba PNTL iha 2025 no autorizasaun ba loke konkursu públiku ida ba admisaun ba kursu formasaun ajente sira no kursu formasaun ofisial sira, publika ona iha Jornál da Repúblika,”  Ministru Interiór Francisco Guterres, informa ba jornalista hafoin audiénsia ho Komisaun B Parlamentu Nasionál,  Segunda lorokraik (14/07/2025).

Iha audiénsia ho komisaun B PN ne’e, Ministru Interiór Francisco Guterres  mós husu Komisaun B hola parte hotu iha komisaun rekrutamentu ba kadetes foun PNTL atu nune’e sira ba haree prosesu rekrutamentu la’o duni ho transparante no tuir regra ka rekizitu sira ne’ebé mak kontempladu.

“Prosesu iha ona mak ne’e hahú fula-Agostu ne’e juri komesa servisu ona, sira mak sei determina data katak bainhira mak sira atu loke  prosesu ne’e bapPúbliku para bele fó oportunidade ba komunidade sira, joven sira  atu kompete iha vaga sira ne’e,”  Francisco Guterres esplika.

Iha fatin hanesan Prezidente Komisaun B  PN, Deputadu Domingos Augosto  “Deker” haktuir informasaun husi Ministru Interior fixa ona katak tinan 2025 iha fulan-Agostu realiza ona prosesu ba rekrutamentu kadetes foun Polísia Nasionál Timor-Leste (PNTL).

“Rekrutamentu kadetes foun PNTL ne’e sei envolve ho Komisaun B iha Komisaun rekrutamentu Polísia,” Deputadu Domingos  Augosto “Deker” hateten.

Sita husi publikasaun Jornál da Repúblika, edisaun Kuarta, 12 Fevereiru 2025, série I númeru 7,  fundamenta katak IX Governu Konstitusionál kontinua atu halo esforsu sira atu dezenvolve rekursu sira husi Polísia Nasionál Timor-Leste (PNTL), iha sentidu atu fornese ba nia ho númeru pesoál ne’ebé sufisiente ba dezempeñu ba ninia misaun no tuir planu sira planu estratéjiku sira ne’ebé aprova ona, nomeadamente Planu Estratéjiku 2023 – 2030  (Planu Dezenvolvimentu Sustentável ba Polisiamentu iha Timor Leste),  Planu Estratéjiku Seguransa nian Internu 2011–2030, Planu Dezenvolvimentu Estratéjiku 2011–2030 no Programa IX Governu Konstitusionál.

Objetivu  rekrutamentu kadetes foun PNTL maka atu “hametin efetivu no hadi’a kapasidade operasionál”, tanba PNTL hasoru dezafiu signifikante iha tinan hirak liubá tanba falta rekursu umanu ne’ebé sufisiente atu kumpre efetivamente hala’o sira-nia funsaun, iha teritóriu nasionál tomak, no défisit pesoál ida-ne’e sai aat liután, lahó iha influénsia korrespondente ida hosi elementu foun sira.

Konsidera katak prosesu rekrutamentu ida, durante iha tinan ne’e, sei halo posivel atu reforsa pesoál PNTL nian, fornese ba nia rekursu umanu barak liután atu asegura prezensa polísia nian adekuadu iha munisípiu hotu-hotu iha nasaun, ne’ebé sei tradús ba iha resposta ne’ebé boot liu, no mós iha melloria ida husi nivel sira patrullamentu no vijilánsia nian, kontribui ba sentidu seguransa no prezensa ne’ebé boot liu ho populasaun sira.

Konsidera mós segundu, katak “rejuvenesce funsionáriu sira no promove renovasaun”, aleinde défisit numériku, PNTL mós hasoru dezafiu envellesimentu nian nia funsionáriu sira, no ajente atuál barak iha ona besik ona ba idade reforma nian, iha média maizumenus tinan 46, ne’ebé bele agrava liután falta ofisiál polísia iha tinan hirak oin mai.

Konsidera katak abertura ba prosesu rekrutamentu ida iha 2025 sei permite inkorpora númeru konsideravel ida ajente sira ne’ebé joven liu, nune’e promove renovasaun no rejuvenesimentu ba pesoál sira instituisaun nian, ne’ebé sei benefisiál la’ós de’it iha termu operasionál sira, maibé mós atu introdús dinámika no hanoin foun iha estrutura polísia nian.

Konsidera mós terseiru, katak “promove reprezentasaun no prosimidade ba komunidade sira”, atu nune’e bele garante forsa polísia ida ne’ebé reprezentativu liután husi diversidade nasaun nian, esensiál atu estabelese relasaun konfiansa no prosimidade ho diferente komunidade sira.

Konsidera katak rekrutamentu ofisiál ba PNTL ne’e nesesidade estratéjiku ida ne’ebé maka vital atu asegura lideransa, kapasidade atu komanda no foti desizaun sira iha senáriu kompleksu sira no risku, responde ho efetivu ba ezijénsia sira ne’ebé maka aumenta seguransa nasionál no instituisaun PNTL nian.

Konsidera ikusmai katak, rona tiha Komandante-Jerál PNTL, tuir termu artigu 92 nian husi Dekretu-Lei No. 35/2024, husi loron 18 fulan-Outubru, ne’ebé aprova Estatutu Polísia Nasionál Timor-Leste nian, define katak nesesidade ba pesoál  ne’ebé atu rekruta ba PNTL iha tinan 2025 ne’e vaga hamutuk 500, ne’ebé vaga 400 ba konkursu públiku ba admisaun ba Kursu husiFormasaun ba Ajente sira, ba entrada tuir mai iha pozisaun Ofisiál Polísia Nasionál Timor-Leste, no vaga 100 ba konkursu públiku ba admisaun ba Kursu Formasaun ba Ofisiál sira, ba entrada tuirmai iha kargu Asistente Inspetór nian.

Ba rekrutamentu kadete foun PNTL nian ho total vaga 500 ne’e Governu rezolve tuir termu artigu 92 husi Dekretu-LeiNú. 35/2024, loron 18 fulan-Outubru, hodi determina nesesidade ba pesoál sira ne’ebé atu rekruta ba PNTL iha 2025 ne’e vaga hamutuk 500, autoriza Ministru Interiór atu lokekonkursu públiku ho vaga 400 ba admisaun iha Kursu Formasaun Ajente nian ba entrada tuir mai iha pozisaun husi Ajente Polísia Nasionál Timor-Leste nian,  Autoriza Ministru Interiór atu loke konkursu públiku ho vaga 100 ba admisaun ba Kursu Formasaun ba Ofisiál sira ba entrada tuir mai iha kargu Inspetór Asistente Polísia Nasionál Timor-Leste nian.

Jornalista: Juvinal Cabral dos Santos