Hatutan.com, (18 Jullu 2025), Lautem-Família Raul Lemos-Krisdayanti ka koñesidu ho naran KD  ho  grupu Le-Ziavál halo paseiu ba Illa Jaco no aproveita momentu kmanek ne’e promove kultura Timor-Leste nian ho maneira uza roupa tradisionál (tais) no halo atividade dansa tebe-tebes.

Lee Mós: Raul Lemos-KD Apoiu Trofeu Bá Manan Na’in sira Timor Leste Music Awards 2024

Raul Lemos-Kridayanti ho família hamutuk ho grupu Le-Zeavál promove kultura Timor hodi uza tais Timor iha Valu. Foto/Hatutan.com

Atividade ne’e nu’udár parte ida promove poténsia turizmu kulturál no poténsia turizmu natureza Illa Jaco nian.

Illa Jaco maka illa ki’ik ida ne’ebé iha parte leste Timor-Leste nian husi Suku Tutuala,  Munisípiu Lautem ne’ebé halo parte iha Parke Nasionál Nino Konis Santana. Illa ne’e hanesan destinu turístiku popular ida ba mergullu no snorkeling, ho tasi-ibun ho rai-henek mutin no bee ne’ebé moos hanesan kristál.

“Fulan-Juñu no Jullu nia rohan, hanesan tempu feriadu eskolár nian, entaun Maun Raul ho ha’u planeia ona ba tempu balun atu fó tempu ba ida-ne’e. Nunee, ami nia vizita mai Timor-Leste hodi halo paseiu no esplora fatin turístiku Timor-Leste nian ne’ebé fantástiku no sai orgullu ba Timoroan hotu,” Krisdayanti hateten ba Hatutan.com Illa Jaco, Kinta (17/07/2025).

Família boot Raul Lemos-Krisdayanti hala’o viajen husi Dili ba Jaco iha loron  17 fulan-Jullu ne’e. Maibé molok, viajen ba parte leste Timor-Leste nian ne’e, Raul Lemos ho Krisdayanti akompaña ho oan doben Amora Lemos ho Kellen Lemos, halo ezersísiu  hodi esplora beleza fatin turizmu Área Branka ka Kristu Rei liuhosi estrada foun.

“Ami família  aproveita tempu  vizita ita-nia fatin favoritu Illa Jaco, dook hosi sidade ho nia ambiente naturál ne’ebé úniku no moos,” Krisdayanti hateten.

Diva Pop Indonézia ne’e halo vizita ba Illa Jaco ne’e ba dala rua ona no nia orgullu tebes no sente hakmatek loos beleza no natureza Illa Jaco nian.  

“Agradese ba Maromak katak Maromak haraik bensaun ba ami nia viajen, ikus mai ami konsege mai fali tan  Illa Jaco ho tempu ne’ebé maka amigavel tebes no mós dadeer ne’e ami iha oportunidade atu hasai foto ho ita nia joven sira,  dansadór sira  ne’ebé espesiál tebes dansa Tebe-Tebe husi grupu Le-Ziavál,” KD hateten.

Família Raul Lemos-Krisdayanti iha Illa Jaco  hatais vestuariu tais Timor husi Munisípiu Manufahi no halibur malu iha  dahur tebe-tebe hamutuk ho grupu Le-Ziavál iha Valu molok ho bero ba Illa Jaco luku no esplora rai-henek mutin ho laloran tasi Illa Jaco nian.

Le-Ziavál ho família Raul Lemos-Krisdayanti hasai imajen no video uza vestiáriu tais husi munisípiu sira seluk hodi dahur tebe-tebe hamutuk.

Família Raul Lemos-Krisdayanti foto iha Valu. Foto/Hatutan.com

Maun Raul Lemos  iha vontade atu promove nafatin kultura Saida mak nia sempre admira kona-ba tradisional mak, liuhosi nia esforsu rasik, nia sempre lori ba naroman tantu beleza naturál no rikusoin kulturál. Raul sempre hakarak atu halo ida-ne’e asesivel ba komunidade no publiku.

“Maun Raul Lemos iha paixaun  boot promove ita Timor nia identidade no kultura tanba ne’e liuhosi vizita mai Illa Jaco, ita  halibur malu ho Le-Ziavál tebe-tebe uza vestiáriu tais  aproveita foti video no imajen sira hodi publika  iha mídia sosial; Instagram, Facebook  no YouTube, nu’udár  esforsu ne’ebé  fasil liubá ita atu promove Timor-Leste nia furak,” Krisdayanti hateten.

Durante  viajen  husi Dili to’o Tutuala (Illa Jaco),  Raul Lemos-Krisdianti ho familia no grupu Le-Ziavál tuir dalan halo interasaun  ho komunidade no sosa produtu lokál no sosa mós  tais Lospalos iha fatin Alojamentu Com nian.

Molok ne’e, iha loron 05 fulan-Outubru tinan 2023, kaben-na’in selebridade Raul Lemos-Krisdayanti, hamutuk ho sira-nia oan doben Amora Lemos ho Kellen Lemos vizita Illa Jaco iha Timor Leste.

Sira gosta tebes illa neʼe nia furak, inklui tasi-ibun ho rai-henek mutin no tasi-been neʼebé moos. Krisdayanti mós apresia amizade hosi ema lokál sira no kultura úniku iha ne’ebá to’o  nia  enkoraja governu Timor-Leste atu promove liu tan Illa Jaco sai fatin turístiku ezótiku ne’ebé bele atrai sidadaun estranjeiru sira.

Lee Mós: Family Time: Raul Lemos Boyong Krisdayanti, Amora dan Kellen ke Pulau Jaco

Jornalista: Juvinal Cabral dos Santos