Hatutan.com, (10 Setembru 2025), Díli– Broker sira ne’ebé aproveita hatan osan ka fee iha fasilita trata pasaporte ba abitante hirak ne’ebé presiza liu kontinua eziste iha  Diresaun Nasionál Servisu  Rejistu Nitariadu (DNRN).

Joven atus resin forma iha Diresaun Nasionál Servisu Rejistu Nitariadu hodi trata dokumentu atu aplika ba vaga Nova Zelándia. Foto/Marcelino Tomae

Iha situasaun ohin loron, joven barak presiza loos trata sira-nia dokumentu komprovativu sira hodi aplika ba vaga ba Nova Zelándia, maka broker sira mós aproveita di’ak.

Sira kobra ema ida $20.00 ba trata Billete Identidade, bom komportamentu $30.00, sertudaun RDTL halo foun  $10.00 renova $5.00 no pasaporte $150.00.

Broker (brokerage) maka intermediáriu ida ne’ebé liga kompradór sira no vendedór sira iha tranzasaun ida, tantu iha merkadu kapitál (hanesan asaun no forex), propriedade, ka setór sira seluk, no jeralmente hetan lukru hosi komisaun sira ka taxa servisu nian hosi tranzasaun.

Orlando de Andrade, abantente ida ne’ebé hakarak trata nia dokumetu iha DNRN fó sasin katak nia parte hakfodak haree atetude broker sira ne’ebé ejiste iha DNRN husu osan ba ema sira atu faislita trata dokumentu ho lalais.

“Relasiona ho vaga online servisu bá  Nova Zelándia, fó dadauk ne’e,  ha’u sente tempu limitadu tebetebes, tanba la biban atu ema trata dokumentu komprovativu sira, ho nune’e, barka liu foti dalan lais uza broker hodi fasilita trata sira-nia dokumentu,” Orlanndo de Andrade hateten ba Hatutan.com.

Orlanndo konsidera  tempu ne’ebé SEFOPE fó sai limitadu liu,  tanba haree bá dezempregu joven Timor-oan laiha servisu,  nune’e nia husu Governu liu-liu SEFOPE atu bele halo estensaun  bá fulan ida ka fulan rua.

Rejistu online vaga ba Nova Zelándia  ho durasaun tempu loron haat (4) de’it, hahú husi loron 08-12 fulan-Setembru tinan 2025, tuir  Orlanndo de Andrade katak  sei implika bá Joven sira  ne’ebé trata dokumentu tuir prosesu  normál sei hasoru dezafiu, ema ne’ebé iha osan sei garantia atu liu husi broker, maibé joven ne’ebé maka osan laiha, depois sei la hetan oportunidade.

Tuir Orlando nia observasaun katak, Joven forma barak iha  Diresaun Nasionál Servisu Rejistu  Nitariadu ne’e,  maioria atu halo bom komportamentu, pasaporte  bulletin identidade.

Liuhosi telefonika     Diretór  Jerál   Diresaun Nasionál  Servisu Rejistu  Nitariadu,  Agustiho Gonçalves Viera hateten,  kona-bá broker  eziste iha  ne’ebé hodi husu osan to’o $30,000, bá sidadaun sira ne’e normál hela.

“Imi (Jornslista-Red) labele sibuk, tanba ema barak ne’e, normál hela, asuntu sira hanesan imi husik  bá nega? Problema broker sira husu osan ne’e, sé maka  haruka sira fó?,” Diretór Jerál DNSRN Agustiho Gonçalves Viera hateten.

Iha fatin hanesan Vise Ministru Asuntu Fortalesesimentu Institusionál Paulo Remedios hateten ohin  simu informasaun  husi públiku no Diretór Nitariadu kona-bá  difikuldade sira ne’ebé  iha  DNSRN atravesa, tanba ema barak mai  atu  trata dokumentu.

Nia dehan, difikuldade, ne’ebé Nitariadu enfrenta maka pasaporte no rejistu kriminál, tanba joven barak mai atu  trata dokumentu  liga ho vaga online  Nova Zelándia atu kontrata Timor-oan  bá servisu iha rai li’ur.

Kona-bá prazu bá  dokumentu   ninia   nia sei  sujere bá Nitariadu, depois  koordena ho  Ministériu seluk atu  halo kordenasaun di’ak ho rejistu Nitariadu halo kordenasaun di’ak kona-bá prazu dokumentu, tanba haree desde horsehik to’o ohin loron rua tiha  ona, Juven barak maka  forma iha hodi halo dokumentu.

“Ita sei kordena ho Ministériu sira, loke rejiaun urjente  iha semana ida-ne’e  ho  Sekretáriu Estadu Formasaun Profisionál Empregu  ne’ebé maka loke vaga online bá Nova  Zelándia ita tenke  iha kordenasaun di’ak, la’ós tau avizu de’it atu bá Nova Zelándia, ema hotu hakarak bá Nova Zelándia,” nia dehan.

Membru Governu ne’e fó ezemplu katak sei loke vaga ema na’in 200, maibé ema  Trata dokumentu liu ema na’in 2000 resin  depois estraga osan de’it atu halo pasaporte, depois la konsege bá, sé maka  atu responsabilidade.

Nia dehan, sei koordena ho SEFOPE atu nune’e  elimina dokumentu balun,  iha kritériu ne’ebé maka fó sai tiha ona.

Observasaun  Hatutan.com  iha resintu Diresaun Nasionál Servisu Rejistu Nitariadu nota katak, joven barak maka bá forma hodi  trata dokumentu,  atu kompetente iha  Vaga Online bá servisu iha Nova Zelándia.

Jornalista: Marcelino Tomae