Hatutan.com, (02 Outubru 2025), Díli-Sidaduan estranjeiru ho nasionalidade Xinés ne’ebé membru Korpu Seguransa Pesoál (CSP) faislita hodi kaer kilat no pistola treinu tiru iha instalasaun treinu tiru iha área Kaitehu, Munisípiu Liquiça, hanesan bilionáriu ne’ebé mai Timor-Leste ho aviaun Zet Privadu.

Bilionáriu na’in-rua ho nasionalidade Xina kaer pistola ho kilat hodi treinu iha fatin treinu tiru iha área Kaitehu, Liquiça ne’ebé fasilita husi membru CSP ida. Foto/Espesiál

Grupu bilionáriu kompostu husi ema liu na’in-rua, foin lalais ne’e, tama Timor-Leste ho aviaun Zet Privadu Bombardier Global Express, nu’udár aviaun negósiu ida ho alkanes voo dook, ho kabina luan ne’ebé koñesidu ba nia luxu no dezempeñu.

Informasaun ne’ebé Hatutan.com asesu hosi fonte importante sira haktuir katak, grupu bilionáriu ka investór ne’e mai Timor-Leste hodi haree oportunidade atu halo investimentu.

Bainhira rikasu  sira ho nasionalidade Xinés ne’e to’o iha Aeroportu Internasionál Prezidente Nicolau Lobato, Dili, simu direta husi ema importante balu ne’ebé okupa kargu iha orgaun soberanu inklui membru ho pozisaun boot iha aparelu Estadu Timor-Leste nian.

Grupu bilionáriu ne’e to’o iha aeroportu liu hosi sala VIP Aerportu Prezidente Nicolau Lobato tanba konsidera ema importante tebes no simu mós husi ema ho pozisaun importante deit iha Timor-Leste.

Informasaun seluk husi fonte Servisu Migrasaun ne’ebé destaka ka koloka iha Aeroportu Internasionál Prezidente Nicolau Lobato, hateten investor ka bilionáriu sira-ne’e mai lori ho sir aida-idak nia pasta, maibé sira lakohi liuhosi raiu-X  hodi pasa revista sira-nia pasta ka sasan sira ne’ebé sira rasik lori.

Parte Servisu Migrasaun inklui pesoál sira husi Administrasaun Nasionál Áerea Timor-Leste (ANATL) ne’ebé kolokadu iha Aeroportu la iha bkiit no kompeténsia atu halo pasa revista ba investor sira-ne’e nia pasta ka sasán ne’ebé sira lori tanbak onsidera bainaka importante ba ema importante sira iha Nasaun ne’e.

Vídeo ne’ebé daudaun ne’e virál iha média sosiál hatudu katak  investór ka bilionáriu nu’udár sidadania Xinés sira-ne’e durante estadia iha Timor-Leste hetan kolokasaun seguransa pesoál ba sira. Ho nune’e, mosu insidente ne’ebé mós virál hatudu membru CSP nu’udár Komandante grupu CSP ne’ebé kolokadu ba apoiu segurnasa ba  Diretór Jerál Servisu Nasionál  Intelijénsia (SNI), Longinhos Monteiro ho inisiál MTJDR fasilita pistola ho kilat ba invstór sira-ne’e treinu tiru iha Kaitehu, Munisípiu Liquiça.

Kilat ne’ebé membru CSP fasilita ba sidadaun Xinés sira treinu ne’e ho marka M-Five (M5) no pistola ho marka Glock-19.

Sidadaun Xinés sira ne’ebé membru CSP fasilita treinu tiru ho kilat no pistola iha área Kaitehu, Liquiça, tama Timor-Leste ho aviaun Zet Privadu, foin lalais ne’e. Foto/Espesiál

Hosi sorin seluk, Portavós Polísia Nasionál Timor-Leste (PNTL),  Superintendente Polísia João Belo dos Reis ne’ebé jornalista sira konfirma kazu ne’e rekoña katak membru CSP ida  ho nia diviza Asistente Inspetór  fó duni kilat  ho pistola ba sidadaun estranjeiru ho nasionalidade Xina hodi treinu tiru iha Kaitehu ne’e hetan ona suspensaun loron 30 hui Komandu Jerál PNTL.

“Obrigadu ba ita boot sira nia observasaun ba situasaun sira ne’e, agora dadaun virál iha média sosiál ho nune’e Komandu  PNTL foti ona medida halo ona suspensaun ba membru CSP ne’e  hodi hein submete ba prosesu investigasaun disiplinar nian,” Superintendente Polísia João Belo dos Reis,  hateten iha Sentru Formasaun Polísia Comoro, Kinta (02/10/2025).

Nia informa prosesu krime ne’ebé deskonfia membru CSP ne’e komete submeter  ona ba Ministeriu Publiku (MP) hodi halo prosesu kriminal ba nia.

“Ita sei husu fali ba nia tanba saida mak nia halo, tanba saida mak nia iha ne’ebá ida ne’e ita sei ke’e informasaun,”  João Belo dos Reis hateten.

Situasaun ne’e akontese autoridade seguransa foti hotu ona arma kiik no boot ne’ebé membru CSP ne’e fó ba sidadaun estranjeiru ho nasionalidade Xina no agora dadaun halo suspensaun ba membru CSP ne’e hela  iha uma loron 30 tanba Komandu PNTL konsidera ida ne’e viola lei tantu disiplinar no kriminál.

Ekipa Hatutan.com