Hatutan.com, (07 Novembru 2025), Díli– Ministru Interiór, Francisco da Costa Guterres, klarifika katak Estadu Timor-Leste asegura ona orsamentu millaun $39 husi montante millaun $42 ne’ebé tama illegal husi Singapura mai Timor-Leste.

Lee Mós: PNTL Asegura Kamioneta Lima Husi Indonézia Tula Mina Ilegál no Lori Osan-Tahan US$111,000.00

Ministru Interiór, Francisco da Costa Guterres. Foto/Juvinal Cabral dos Santos

“Hakarak fó hatene katak kona-bá relatóriu ne’ebé Nasoins Unidas (ONU) fó sai katak osan millaun $45 tama illegal iha Timor-Leste ne’e laloos. Ida loos ne’e mak millaun $42 transferénsia husi Singapura mai iha Dili. Depois liuhusi prosesu ida ne’ebé maka naruk ekipa konjunta ne’ebé maka forma iha Timor-Leste  konsegé deteta millaun $42, millaun $3 foti sai tiha ona, ita konsegé bá rekupera millaun $3, no millaun $39 konzela hela iha Banku,“ Ministru Interiór Francisco da Costa Guterres esplika iha sesaun plenária debate OJE 2026 iha faze jeneralidade iha Parlamentu Nasionál, Sesta (07/11/2025).

Membru Governu ne’e esplika daudaun ne’e millaun $3 iha hela Ministériu Públiku hodi iha prosesu julgamentu no ema na’in-haat ne’ebé maka tama iha prosesu ida-ne’e, kompostu husi na’in-haat ho nasionalidade estranjeiru no sira iha hela prizaun preventiva ho Timoroan ida ne’ebé mós agora iha prosesu aprezentasaun regular ba iha Ministériu Públiku.

Ministériu Interiór afirma tán katak prosesu ne’e la’o hela Governu  kontinua buka tuir nafatin, atu  rekupera osan no foin lalais ho prosesu hotu ne’ebé maka iha konsegé hetan rekoñesementu husi Governu Singapura tanba konsegé deteta estranjeiru na’in-haat ne’ebe mak involve aan iha kazu ida-ne’e.

“Bá servisu no intervensaun ba kazu sira ne’e, ita-nia instituisaun relevante sira hetan prémiu ka medulla iha Singapura. Instiuisaun polisiál sira-ne’ebé hetan apresiasuan ne’e mak Servisu Nasionál Intelejénsia (SNI), Unidade Informasaun Finanseira (UIF), Ministériu Públiku nomós Polísia Siéntifiku Investigasaun Kriminál (PCIC), Ha’u hanoin kestaun sira hanesan ne’e ita haree katak ne’e sei iha hela prosesu tribunál no iha hela prosesu julgamentu,“ Ministru Interiór Francisco da Costa Guterres tenik.

Iha fatin hanesan membru PN husi Bankada FRETILIN, Antoninho Bianco hateten, nia parte fiar relatóriu ONU tanba ONU ne’e organizasaun ida iha mundu no Timor-Leste mós pertense iha laran.

“Kuandu organizasaun ne’e ita tenke fiar tanba iha rede ita-nia parte integrante husi ONU, nune’e mós ha’u rona akompañia katak Ministériu Interiór la fiar buat sira ne’ebé mai husi Internasionál nian, di’ak liu ita fiar ka la fiar entaun ita justifika fali ho legál balu,” Deputadu Antoninho Bianco hateten.

Jornalista : Zita Menezes