Hatutan.com, (23 Outubru 2025), Díli–Polísia Nasional Timor-Leste (PNTL), Kuarta (20/10/2025), halo intervasaun ba karreta kamioneta lima (5) hosi Atambua, Distritu Belu, Nusa Tenggara Timur, Indonézia  ne’ebé tula mina hatama mai Timor-Leste no lori mós ho osan-tahan ho montante US$111,000.00.

Lee Mós: UPM Kaptura Suspeitu Na’in-ualu Hatama Sasán Ilegál iha Atabae

Osan-tahan US$111,000.00 ne’ebé Polísia prende. Foto/Juvinal Cabral dos Santos

Portavós interinu PNTL, Superintendente Asistente Polísia Mozinho Correia, ba jornalista sira Kinta (23/10/2025), informa karreta sira ne’e mai mamuk ho objetivu atu tula produtu lokál iha Dili laran, maibé iha tempu ne’ebé hanesan sira mós hatama mina ilegál gazoel no gazoliña subar iha karreta laran ho mós  lori osan-tahan ho montante US$111,000.00 ne’ebé loloos ne’e hetan deklarasaun husi Autoridade Indonézia ho Timor-Leste nian, maibé laiha.

Karreta prende prosesu sei la’o hela hodi kompleta prosesu ba detensaun nian, ohin Kinta 23 fulan-Outubru tinan 2025  mak konta mina sira ne’e husi karreta lima ho nia númeru mátriku  DH 8400TC, DH 8007TC, DH 8462EA, DH 8572EF, DH 8952EH.

Nia esplika kada karreta sira tula mina jerigen litru 30 hamutuk ualu (8) to’o  sia (9), sira-nia modu karreta ne’e mai mamuk pois mina sira ne’e sira subar iha sasis karreta nian.

Liga ho kazu ne’e PNTL halo ona detensaun ba sidadaun Indonézia  nian na’in-lima (5) no halo identifikasaun ba ema ne’ebé nain ba osan ne’e iha Dili,.

PNTL mós prende mina sira ne’ebé hatama ilegálmente, dadaun evidensia karreta lima no mina sira ne’e asegura iha Kuartel Jerál PNTL.

Nia haktuir, investigasaun osan ne’e hatama para atu hola produtu lokál sira liu-liu kamí, maibé maneira sira hatama osan ne’e mak la tuir prosedimentu legál nian tuir Leí numeru 17/2011 nian, Leí prevensaun ba kombate brankamentu kapitais.

“Atu hateten katak osan $10,000 ba leten obrigatoriamente tenke deklara ba iha autoridade Alfándega, Leí ne’e la’ós Timor-Leste de’it mais globalmente hanesan ne’e, maibé ba kazu ida ne’e la deklara tanba ida ne’e ita halo apreensaun,” portavós PNTL interinu ne’e afirma.

Kazu ne’ebé hanesan iha loron Tersa 21 fulan-Outubru tinan 2025 ekipa halo operasaun  sekreta ekipa konjuntu N2 komponente Naval aprosima  sasan kontra bandu ne’ebé  ne’e husi Suku Daer,  Maubara, Munisípiu Liquiça, to’o iha Díli hafoin intrega ba iha Unidade Polísia Maritima (UPM) halao Chek  ba sasan kontra bandu sira mak sasan hanesan teh pucuk dos 41, Teh Kotak dos 53, Coca-Cola dos 30, kalen 17, Du C1000 dos 32, sasan hirak ne’e karreta ho marka Lankruser Prado númeru matrikula 23.892 TL mak tula.

Relasiona ho kazu ne’e, PNTL liu hosi Diresaun Servisu Investigasaun Kriminál (DSIK) halo ona identifikasaun ba suspeitu nain-rua mak ho inisial AJS no A.L.X.C.d S, sidadaun Timoroan, kazu ne’e registu ona iha gabinete sentral prokurador jeral.

Jornalista: Juvinal Cabral dos Santos