Hatutan.com, (17 Dezembru 2025), Díli-Durante loron rua, Tersa-Kuarta, (16-17/12/2025),   vitíma hamutuk na’in-92  hato’o  keixa bá Polísia Nasionál Timor-Leste (PNTL) tanba sira konsidera kompañia Raimakmor ne’ebé lidera husi Armando Ximenes halo fraude ka bosok sira hatama osan atu hetan kreditu mas to’o agora la iha informasaun.

Diretór Raimakmor, Armando Ximenes iha polísia nia oin kompromete devolve vitíma sira nia osan ne’ebé hatama ona ba Raimakmor. Foto/Juvinal Cabral dos Santos

Vítima sira ne’e deklara ba Polísia katak empreza Raimakmor bosok sira kada ema hatama US$100.00 atu bele asesu ba kreditu entre US$1000.00 no sé mak harama US$1500.00 bele asesu ba kreditu US$15,000.00 nune’e sira hatama tiha, maibé besik tinan ona osan kreditu ne’e Raimakmor la fó. Ho nune’e, sira ezije atu Raimakmor devolve sira nia osan ne’ebé sira hatama ona.

Maioria vitíma sira ne’e mesak terseira idade ho sira-nia okupasuan hanesan to’ós na’in, inklui balun fila-liman iha merkadu. Sira ne’e mai hosi Munisípiu Baucau, Viqueque, Ermera, Manufahi,   Oé-Cusse no balun iha Díli.

“Primeiru ha’u hato’o deskulpa ba ita boot sira, no dala ruma ita boot sira hanoin katak fó osan ne’e halo buat seluk, maibé ita haree ba sistema ne’e ne’ebé iha estrutura mós iha ne’ebá nia diresaun. Ha’u inisiador inisia para programa ne’e la’o di’ak, maibé ezekusaun ne’e la’ós ha’u mak kaer direita, osan ne’e la’ós ha’u mak kaer direta, ha’u la simu direta ema ida nia osan,” Diretór Jerál kompañia Raimakmor Lda, Armando Ximenes, lia tun ba vitima sira bainhira hasoru malu iha  Komandu Polísia Eskuadra Vera Kruz, Dili, Kuarta (17/12/2025).

Nia informa,  problema kompañia Rai makmor mak demora ezekusaun tanba ne’e mak balun atu rezigna an, formulariu ida mós antes ne’e fó ona se-se mak rezigna an ne’e prienxe para hodi bele trata asuntu ne’e dala ida.

“Ita ne’e investe la’ós kliente, tanba ne’e ha’u horseik ne’e atu bele haree tanba ezekusaun mós barak mak sai. Maibé até agora, no orsida hotu mós ami sei ko’alia tanba ezekusaun barak ne’e mós sira la devolve fila mai kompañia,” Armando Ximenes hateten.

Diretor Jerál  Raimakmor informa, tanba ne’e iha garantia katak sira Ermera, no Díli balun hakarak atu rezigna ana,  prontu ohin iha ne’e akordu asina ona katak iha loron 26 fulan-Janeiru 2026  tenke rezolve maibé hotu-hotu lori ho resibu banku.

“Iha balun la iha resibu banku ita la hatene husi ne’ebé, ha’u fiar katak sukursal barak sei la’o hela, maibé dalaruma maluk sira balun deskonfia mais ha’u buat hotu entrega ba Maromak. Ne’ebé ha’u iha responsabilidade para atu rezolve problema sira ne’e to’o hotu tanba ha’u mak inisia kompañia Raimakmor,” Armando Ximenes hateten.

Karta akordu ne’ebé Hatutan.com asesu, hatudu katak ne’e asina husi responsavel másimu, prezidente ka Inisiador Kompañia Raimakmor L.da., Armando Ximenes, Xefe Diretor Investimentu Martinho de Sá, Vise Presidente komisariu, José Luis da Costa Oliveira, Direktora Finansas Goreti Efendy Maria, hodi  kompromete rembolsa vitíma sira-nia osan iha loron 26 fulan-Janeiru 2026.

Karta akordu halo iha Tersa, 16 Dezembru 2025,  tuku 12:00 Otl, Diretor hamutuk ho Estrutura kompañia Raimakmor Lda halo akordu ida ne’e iha edifisiu PNTL hodi deklara katak, dividas husi membru kompañia sira ne’ebé atu rezigna an husi kompañia Raimakmor kompromete devolve ka reembolsa.

“Ami estrutura prontu reenbolsa ka devolve osan ne’ebé kliente sira hakarak sai ka rezigna an husi kompañia Raimakmor Lda , ho nune’e kompañia sei halo pagamentu iha dia loron 26 fulan-Janeiru  tinan 2026.”

Prosesu pagamentu sei tuir lista ne’ebé iha aneksa tuir dokumentus konprativas. Sekarik maka la rezolve kompañia ho strutura sira sei toma responsabilidade tuir lei ne’ebe maka vigora.

Vitíma nain-92 halo keixa ba Polísia tanba konsidera empreza Raimakmor bosok sira hatama osan atu asesu ba kreditu. Foto/Juvinal Cabral dos Santos

Iha fatin hanesan Inspetór Asistente Polísia Joel Pereira dehan, vitíma ne’ebé naran iha lista hamutuk 92 ne’ebé  pasensia uitoan labele uza nervozu no labele trata malu atu nune’e kompañia bele fó fila imi nia osan.

“Hau hanoin prosesu mak ne’e husi karta akordu iha loron 16 fulan-Dezembru tinan ne’e, tuku 12 meudia, Diretór Kompañia Ramakmor  hamutuk ho nia estrutura halo akordu ida ne’e iha Edifisiu Polísia Nasionál Timor-Leste (PNTL) Komandu Munisípiu Díli hodi deklara katak divida husi membru husi Kompañia sira ne’ebé atu rezigna an, estrutura Kompañia deside no kompromete deviolve,” Inspetor Asistente Polisia Joel Pereira hateten.

Tuir data ne’ebé determina husi Kompañia Raimakmor Lda la realiza pagamentu ka la devolve ba membru sira ne’ebé tau kapital mak hamutuk na’in-92, maka estrutura Raimakmor sei resonsabiliza perante Lei.

Jornalista: Juvinal Cabral dos Santos