Hatutan.com, (19 Fevereiru 2026), Díli- Komunidade Musulmanu Timor-Leste, Kinta (19/02/2026), hahú hala’o jejun durante fulan-ida hodi hamoos sira-nia sala.

Lee Mós: Komunidade Musulmanu iha Timor-Leste Selebra Loron Eid al-Fitr

Komunidade Musulmanu Timor-Leste selebra loron Idul Adha 1445 Hijriah iha Meskita An-nur, Kampu Alor, Díli. Foto/dok

Xefe Fundasaun  AN-NUR, Muhamad Anwar da Costa, hateten Musulmanu iha Timor-Leste  hahú hala’o  jejun to’o loron 19 fulan-Marsu  2026 molok selebra loron Idul-Fitri iha loron 20 fulan-Marsu 2026.

“Sentidu loloos husi fulan jejun mak loron bai-bain ita han-hemu tuir ita nian hakarak, depois ita la espera katak loro-loron ita hasai lia-fuan aat  ka lia-fuan ne’ebé  ladi’ak ba ita nia família uma-laran, kolega no mós ba ema seluk. Entaun, ho fulan jejun ida-ne’e mak oinsá  ita bele hamoos ita nian sala ka pekadu durante ita halo iha tinan ida nian laran,” Xefe Fundasaun AN-NUR, Muhamad Anwar da Costa ba Hatutan.com iha Meskita AN-NUR.

Nia afirma durante ne’e komunidade musulmanu iha Timor-Leste hala’o sira nia fulan jejun nakontu ho toleránsia husi relijiaun Katólika  iha Timor-Leste no dezde uluk kedan Timor-Leste nia toleránsia di’ak liu ho nasaun seluk ne’ebé ho dezenvolvimentu maka’as.

“Ami tinan-tinan selebra loron Idul Fitri no loron Idul Adha la mosu problema no iha ne’e ami nia vizinu katóliku hotu, no mós iha ne’e loro-loron ami adjan dala-lima uza mic ho lian maka’as, maibé laiha ema ida mak mai kontesta ka reclama , husi ne’e bele haree katak komunidade Timor-Leste nakontu ho toleránsia,” Muhamad Anwar da Costa  hateten.

Xefe Fundasaun  AN-NUR ne’e husu ba komunidade Musulmanu sira iha teritóriu tomak iha Timor-Leste,  inklui mós iha munisipíu sira, sira ne’ebé hala’o fulan jejun ne’e tenke respeitu fulan sagradu ida-ne’e, labele halo aat no labele halo atividade ne’ebé kontra fé no kontra jejun nune’e bele   fulan ida remata komunidade musulmanu sira  bele festeza loron vitória ka Idul Fitri hamutuk.

Jornalista : Zita Menezes