Hatutan.com, (16 Marsu 2026), Díli-Reprezenta kadete Polísia Nasionál Timor-Leste  (PNTL) ezije ba Komisaun Suprevizaun no Fiskalizasaun Revizaun ba rekrutamentu PNTL 2025 atu anula totál prosesu rekrutamentu PNTL. 

Lee Mós: Kadete PNTL Sei Organiza Manifestasaun iha Ministériu Interiór

Kadete PNTL halo asaun hasoru Ministériu Interiór no ezije anula totál prosesu rekrutamentu PNTL 2025. Foto/Juvinal Cabral dos Santos

“Deklarasaun husi komisaun suprevizaun no fiskalizasaun hateten katak sira identifika ona Polísia nia oan  na’in-71, veteranu nia oan na’in-72, maibé oinsá ho polísia nia família subriñu/a sira rekomenda ne’e nusa sira la halo investigasaun, ida ne’e mak problema, tanba ne’e ami nafatin reziste para di’ak liu anula totál,” Porta-voz kadetes PNTL, Tito Orleans Missa, informa ba jornalista sira bainhira hala’o  asaun protest hasoru Minitru Interiór iha Resintu  Universidade Nasionál Timor Lorosa’e (UNTL),  Caicoli, Díli, Segunda(16/03/2026).

Reprezentante kadete PNTL konsidera komisaun suprevizaun no fiskalizasaun ba revizaun rekrutamentu PNTL seidauk justu no konsidera rezultadu  husi servisu komisaun supervizaun no fiskalizasaun ba revizsaun rekrutamentu PNTL la prudente.

“Ami nia hakarak mak anula totál tanba prosesu husi inisiu ne’e komisaun viola ona diploma ministerial, viola akordaun Tribunál, sira aturiza ema kumpri Leí, sira mak tenke kumpri uluk,” Tito Orleans Missa informa.

Portavós kadete PNTL, hateten, asaun pasifika ida-ne’e  responsabilidade ema hotu-hotu ninia liu-liu povu, kamadas sosiál sira, no veteranu sira nian hotu, asaun ne’e nia kontinuasaun sei organiza másimu liután.

Nia hatutan, polísia sira dehan kumpri Leí noOorden ne’e tuir loloos sira mak tenke hatudu ezemplu, polísia sira mai halo asaun la kumpri tiha ona lei oinsá obriga sidadaun sira kumpri Leí.

“Ami halo karta koñesimentu ba PNTL tanba atu asegura la’ós husu aturizasaun, karta ba Reitor UNTL nia dehan katak la aturiza tanba orsida perturba ensinu akademiku maibé demokrasia husi autonomia Universidade hahú husi ne’ebá kontrolu sosiál ne’e importante pilar tolu ne’e mak peskiza, estuda, kontrolu sosiál ne’e importante tanba saida mak sira halo hanesan ne’e, orsida ami halo dialogu hodi aturiza espasu ida ne’e ami halo asaun pasifika fulan ida”, Portavós kadete PNTL preukupa.

Karta ba PNTL ne’e bazeia ba lei númeru 01/2006 ne’e kadete sira halo avizu préviu de’it signifika rekoñesimentu la husu aturizasaun entaun polísia tenke kumpri ba Leí ne’ebé eziste ne’e.

Iha sorin seluk Komadante Polísia Nasional Timor-Leste (PNTL) Munisípiu Díli, Superintendente Xefe Polísia Orlando Gomes, hateten, Komandu Munisípiu Dili hetan orientasaun husi Komandu Jeral PNTL prontu para asegura seguransa iha kapitál Dili.

Komadante Polísia Nasional Timor-Leste (PNTL) Munisipiu Díli, Superintendente Xefe Polísia Orlando Gomes. Foto/Juvinal Cabral dos Santos

“Ita nasaun demokrátiku iha liberdade no mós reaniaun atu bele halo espresaun iha Públiku, maibé ita nafatin tuir regras Leí manifestasaun ninian Leí númeru 01/2006 kona-ba (Liberdade reuniaun no manifestasaun),” Superintendente Xefe Polísia Orlando Gomes afirma.

Nia haktuir, maske karta koñesimentu hatama iha Komandu jerál PNTL liuhusi Komandante operasaun maibé nafatin labele halo manifestasaun iha espasu públiku ne’e tuir Leí númeru 01/2006 ninian.

“Tanba ne’e ohin Komandu munisípiu Díli ita iha terenu apoiu seguransa iha terenu para labele halo impedimentu movimentu públiku ninian, katak hotu-hotu tenke la’o normál kuandu halo manifestasaun ne’e nafatin tuir regras ita labele viola leí manifestasaun ninian,” hateten komandante polísia munisípiu Díli.

Komandante Polísia Díli ne’e esplika, atu hateten katak ohin ne’e fatin espasu públiku labele halo manifestasaun iha fatin públiku.

“Karta koñesimentu hato’o ona ba iha Komandu jerál PNTL iha semana kotuk liuhusi Komandante operasaun, halo kontaktu ho manifestante sira mós la iha ligasaun. Tanba ne’e ita nafatin kumpri Leí manifestasaun nian katak tenke komunika ba sira katak mai tur hamutuk hodi deside fatin ba manifestasaun ninian mais realidade ida ne’e la akontese sira la mai”, Orlando Gomes haktuir.

Nia dehan, Komandu  PNTL Munisípiu Díli simu orientasaun husi Komandu jerál katak la aturiza  atu halo manifestasaun iha fatin públiku.

Liuhusi karta koñesimentu ba iha autoridade seguransa PNTL ne’e sira sira nia karta sita katak  avizu préviu relasaun ho rekrutamentu PNTL ne’e hahú asaun pasifika ne’e iha Segunda dia (16/03) ohin to’o fulan ida, maibé kada semana sira  halo asaun pasifika ne’e iha  loron Segunda, Tersa, no Kuarta hahu tuku 08:00 dader Otl to’o 18:00 lorokraik Otl.

“Orientasaun husi Komandu jerál la aturiza halo manifestasaun iha espasu públiku, sé sira kontinua nafatin ita tenke hamamuk fatin ne’e, tanba halo impedimentu ba movimentu públiku sira no mós intrope ona eskola UNTL Caicoli sira nian,” autoridade seguransa ne’e hatutan.

Atu deside fatin ba kadetes PNTL sira hodi hala’o asaun pasifika ne’e Portavós kadetes sira tur hamutuk ho komandante operasaun mak bele deside fatin manifestasaun.

 Jornalista: Juvinal Cabral dos Santos