Hatutan.com, (25 Marsu 2026), Díli-Komandante Jerál Polísia Nasionál Timor-Leste (PNTL) períodu 2026-2029, Komisáriu Asistente Afonso dos Santos, prontu nafatin serbí nasaun, povu no instituisaun.

PM Xanana tula diviza hanesan ba Afonso dos Santos hanesan Komisáriu Asistente Polísia. Foto/PNTL

Hafoin simu tiha informasaun katak nia hetan nomeasaun husi Governu hodi assume knar importante no másimu iha instituisaun seguransa PNTL, Komisáriu Asistente Afonso dos Santos, hateten kontente bele hetan konfiansa husi ezekutivu Timor-Leste no aprésia tebes ho noemasaun ba segundu komandante jerál PNTL Komisária Asistente  Natércia Eufrásia Soares Martins.

Komisáriu Asistente Polísia Afonso  dos Santos la duvida hamutuk ho Komisária Asistente Polísia Natércia Eufrásia Soares Martin, atu hamutuk lidera no fotalese instituisaun ne’ebé hala’o knaar ho lema  “Atu Serbí no Proteje” no “Mantein Lei ho Ordem”.

“Ne’e kapás tebebes, la’ós foin agora, ha’u mós presiza tanba maizu menus feto hanesan Komisária Asistente Polísia Natércia  iha kapasidade atu halo’o buat barak, “Komisáriu Asistente Polísia Afonso dos Santos hateten bainhira kontaktu liu husi telefone.

Komisáriu Asistente Afonso dos Santos, seidauk bele ko’alia kle’an liu tan tanba seidauk formaliza nomeasaun. Importante mak hanesna Timoroan kontinua servisu ba rai no povu ida-ne’e nia di’ak.

“Agora ha’u seidauk ko’alia, depois mak ita ko’alia,” Komisáriu Asistente Polísia, Afonso dos Santos hateten.

Karreira Profisionál

Komisáriu Asistente Polísia  Afonso dos Santos nu’udar figura proeminente ida iha ierarkia Polísia Nasionál Timor-Leste (PNTL). Nia iha esperiénsia kle’an iha komandu PNTL no knaar lideransa estratéjiku iha forsa nia laran durante ne’e.

Atualmente Komisáriu Asistente Polísia  Afonso dos Santos hala’o papél krusiál sira iha jestaun operasionál no dixiplinár, no hetan rekoñesimentu tanba nia foku ba integridade institusionál no prontidaun forsa polísia nian atu serbí nasaun.

Lideransa iha Diresaun Justisa no Disiplina: Iha Juñu 2025, Komisáriu Asistente Polísia  Afonso dos Santos, hetan nomeasaun husi Komandu PNTL hodi lidera Diresaun Justisa no Disiplina. Iha kna’ar ne’e, nia asume responsabilidade hodi subtitui Superintendente Xefe Justinho Menezes, foka liubá mantein rigór étiku no aplika norma dixiplinár sira iha instituisaun polísia nia laran iha Kuartél Jerál PNTL.

Komandu Operasaun Nasionál: Foin lalais ne’e, iha fulan Marsu 2026, Afonso dos Santos hala’o ona kna’ar nu’udar Komandante Interinu Komandu Operasaun Nasionál PNTL nian. Iha kargu estratéjiku ne’e, nia responsável ba koordenasaun seguransa teritoriál no lidera enkontru altu nível ho unidade oioin, hanesan Servisu Intelijénsia Polísia nian (SIP) no Unidade Espesiál Polísia nian (UEP), hodi garante orden públika iha nasaun tomak.

Koordenasaun ba Eventu sira Estadu nian: Ninia papél habelar ba koordenasaun seguransa nian ba vizita diplomátiku sira ho perfil aas. Iha Janeiru 2026, nia lidera enkontru sira hodi prepara ba vizita Primeiru-Ministru Austrália nian mai Timor-Leste. Papél ida-ne’e hatudu konfiansa ne’ebé tau iha nia komandu hodi jere lojístika no seguransa iha eventu sira ne’ebé envolve soberania nasaun nian no relasaun internasionál sira.

Esperiénsia iha Unidade Espesiál Polísia (UEP): Molok simu kna’ar iha Kuartél Jerál, Afonso dos Santos hala’o knaar nu’udar komandante Unidade Espesiál Polísia (UEP), divizaun ida ne’ebé prestijiadu liu iha PNTL.

Governu liuhusi  reuniaun Konsellu Ministru (KM),  Kuarta (25/03/2026), deside no nomeia  Komisariu Asistente Polísia Afonso dos Santos hanesan Komandante Jerál no nomeia Komisária Asistente Polísia Natércia Eufrasia Soares Martins hanesan Segundu Komandante Jerál Polísia Nasionál Timor-Leste (PNTL).

Segundu Komandante Jerál PNTL, Komisária Asistente Natércia Eufrasia Soares Martins. Foto/Média PNTL

Ministru Interiór (MI) Francisco da Costa Guterres, esplika Komisáriu Asistente Afonso dos Santos ho Komisária Asistente Natércia Eufrasia Soares Martins  nia mandate hahú husi loron 27 fulan-Marsu  2026 no to’o iha loron 27 fulan-Marsu 2029.

Iha reuniaun ne’e, Konsellu Ministru mós ezonera hela Komisária Asistente Polísia Natércia Eufrazia Soares Martins husi Diretora Ezekutiva Servisu Migrasaun no nomeia fali Komisariu Asistente Polísia Jorge Monteiro hanesan  Diretór Ezekutivu foun ba Servisu Migrasaun.

Nia esplika, Komisaria Asistente Polísia Natércia Eufrazia Soares Martins nia haree liu bá reforma Instituisional, halo diagnostiku ida ne’ebé mak forte ba iha polísia para atu hatene problema Polísia ninian atu hadi’a buat hotu.

“Tanba ida-ne’e mak ita foti ema na’in-rua ne’ebé mak di’ak para mai reforma totál para hadia di’ak liután Polísia para  bele hala’o nia servisu di’ak liu tan, tanba ne’e mak komandante jerál mak foka liu ba kestaun operasionais. Enkuantu segundu komandante jerál fharee liu kedas kestaun administrativu, longuístika, planeamentu, ba halo diagnostiku haree mós kestaun disiplina polísia ninian,”  Ministru Interiór Francisco da Costa Guterres hateten.

Jornalista: Juvinal Cabral dos Santos