Hatutan.com, (30 Marsu 2026), Díli-Komandante Jerál Polísia Nasionál Timor-Leste (PNTL) Komisáriu Asistente  Afonso dos Santos, konfirma katak surante nia mandatu lideran instituisaun seguransa PNTL sei laiha intervensaun polítika iha kompeténsia PNTL nian.

Lee Mós: Tinan-26 PNTL, Tenke Atua ho Profisionál no Asegura Estabilidade Nasionál

Komandante Jerál PNTL, Komisáriu Asistente Afonso dos Santos halo vizita traballu ba UEP, Segunda (20/03/2026). Foto/Juvinal Cabral dos Santos

“Durante ha’u lidera Kurpu Seguransa Pesoál (CSP) la eziste intervensaun polítika. Ha’u mak komandante, ha’u mak deside id- ne’e mak loos. Membru governu bele propoin, mais deside ne’e ha’u mak deside la’ós membru governu,” Komandante Jerál PNTL Komisariu Asistente Polísia Afonso dos Santos,  informa ba jornalista sira hafoin halo vizita dahuluk ba  Unidade Espesiál Polísia (UEP) iha  Bairru-Pité, Díli, Segunda (30/03/2026).

Komandu Jerál PNTL Afonso, esplika, eskoltu ne’e termina eskoltu ne’ebé mak bem formadu, nia hakarak ba eskoltu mai treinu lai iha Unidade Espesiál Polísia (UEP).

“Treinu remata depois mak bá, sira agora katuas hotu ona, ita presiza jerasaun foun ne’e mak ohin ha’u mai ko’alia ho komandante UEP Superintendente-Xefe polísia Damião Correia,” Afonso dos Santos haktuir.

Iha fatin hanesan Komandante Unidade Espesiál Polísia (UEP) Superintendente-Xefe polísia Damião Correia hateten, klaru katak iha mós pedidu husi Ministru sira, maibé hato’o liuhusi Ministériu Interiór (MI) to’o ba iha Komandante Jerál depois despaixu mai iha komadante UEP mak foin kolokasaun ba Ministru no alta entidade sira.

“Balun hanesan ita dehan, balun sira mensiona kedas nia naran kompletu, ID kompletu mais ita tenke mai fó formasaun ba sira,” Komandante UEP  ne’e informa.

“Sé hili husi kontinente jerál  Ofisiál Polísia Suku (OPS) mai seguransa pesoál ne’e di’ak polísia hotu, maibé nia la iha koñesimentu ba seguransa alta entidade nian kuandu falla ruma, situasaun ruma oinsá mak nia bele autodefeza ba sua-Exelensia, ida ne’e mak sai kestaun boot ba ami,” Komandante UEP Damião Correia esplika.

Kolokasaun CSP  agora totál na’in-285 ne’ebé mak bá de’it seguransa ba alta entidade ba membru governu sira hotu.

Komadante UEP hateten, rekursu CSP sei menus loos n o dala ruma bainaka alta entidade VIP husi internasional mai dala presiza tebes rekursu CSP atu bele asegura.

“Efetivu UEP agora daudaun hamutuk na’in-708 ne’e ha’u hanoin katak rekursu umanus  menus liu, ita mós prepara ha’u hanoin garantia katak rekrutamentu ne’e mai para bele apoiu,” nia tenik.

Jornalista: Juvinal Cabral dos Santos