Hatutan.com, (20 Abríl 2026), Díli—Manu makikit sira ne’ebé semo iha pista laran Aeroportu Internasionál Prezidente Nicolau Lobato, kontinua fó ameasa ba aviaun sira ne’ebé tun no sa’e iha aerportu ne’e.

Lee Mós: Enfrenta Beibeik Bird Strike, Aero Dili Submete Reklamasaun Ofisiál Ba ANATL Foti Asaun Lalais Hasai Manu Sira Semo iha Pista Aeroportu

Manu makikit kontinua semo iha pista laran Aeroportu Internasionál Prezidente Nicolau Lobato ne’ebé lori risku ba insidente birs strike.

Iha Domingu, 19 Abríl 2026, hale’u tuku 08:00 dadeer Otl,  aviaun Aero Díli  atu take-off ho destinasaun Denpasar-Bali, tenke sofre atrazu minutu balun atu take-off tanba manu makikit semo agrupa iha pista aeroprtu nian.

Informasaun ne’ebé Hatutan.com asesu husi fonte sira iha Aeroportu hateten katak  iha duni medida metigasaun husi parte kompetente hamutuk ho  Unidade Patrullamentu Fronteira (UPF) ne’ebé kolokadu iha Aeroportu Internasionál Prezidente Nicolau Lobato,  hodi tiru no duni manu sira sai husi pista laran, maibé manu hirak ne’e la semo dook husi pista leten Aeroportu Internasionál Prezidente Nicolau Lobato.

Manu sira ne’ebé semo beibeik iha pista Aeroportu Internasionál Prezidente Nicolau Lobato fó risku boot ba aviaun no pasajeiru sira. Tanba bele akontese insidente bird strike ne’ebé fatal no fó prejuizu boot  ba kompañia airline sira.

Fó hanoin fali katak aviaun Aero Dili enfrenta ona insidente bird strike dala-tolu no ba dala-tolu nian iha loron 10 Abríl 2026, konsidera hanesan insidente bird strike ne’ebé afeta maka’ád halo aviaun Aero Dili A319 tenke ba reparasaun durante loron haat ka loron lima iha Aeroportu Internasionál  Ngurah Rai, Denpasar-Bali, Indonézia.

Iha entrevista ida ho Hatutan.com,   Tersa, 14 Abríl 2026, Prezidente Konsellu Administrasaun Aeroportu no Navegasaun Timor-Leste (ANATL E.P), Romualdo António da Silva, informa, ANATL sei sosa kilat-manu fó Unidade Patrollamentu Fronteira (UPF) ne’ebé koloka iha Aeroportu Internasionál Prezidente Nicolau Lobato, atu  tiru manu makikit sira ne’ebé semo livre iha pista aeroportu nian.

ANATL mós foti medida antisipasaun hodi orienta nia tekniku sira uza karreta halo operasuan hale’u aeroportu duni manu sira ne’ebe semo iha pista molok aviaun sira tuun no sa’e.

Autoridade kompetente sira halo mitigasuan hodi duni no tiru manu sira iha pista laran Aeroportu Internasionál Prezidente Nicolau Lobato

Esforsu ANATL nian ne’e seidauk másimu tanba manu makikit konintua semo livre iha pista laran no pista leten Aeroportu Internasionál Prezidente Nicolau Lobato, Dili ne’ebé fó ameasa ba aviaun sira.

Risku ba Inundasaun

Aeroportu Internasionál Prezidente Nicolau Lobato mós enfrenta risku inundasaun. Bainhira udan-boot iha Dili laran, aeroportu ne’e sempre akontese inundasaun hodi prezudika aviaun ho pasajeiru sira tuun iha aeroportu refere.

Iha Domingu-lorokraik, (19/04/2026), udan ho intensidade maka’ás b la liu oras ida,  rezulta Aeroportu Internasionál  Prezidente Nicolau Lobato ho kondisaun bee nalihun maka’ás iha pista laran. Nune’e, pasajeiru sira tuur husi aviaun Aero Dili la’o deit iha bee laran.

Lee Mós: Evita Insidente Bird Strike iha Aeroportu Díli, ANATL Deside Sosa Kilat-Manu Fó UPF Tiru Manu Sira iha Pista Laran

Jornalista: Zita Menezes