Hatutan.com, (12 Abríl 2026), Díli—Empreza airline Aero Dili sente la seguru ho kondisaun pista Aeroportu Internasionál Prezidente Nicolau Lobato ne’ebé kuaze husik livre animal fuik hanesan manu hodi semo iha pista  no hamosu beibeik asidente bird strike bainhira aviaun atu take-off ka atu semo sa’e.

Lee Mós: Aero Díli Hahú Voo Inaugural Ba Kuala Lumpur ho Pasajeiru Na’in-93

Manu makikit semo iha grupu iha pista Aeroportu Internansionál Prezidente Nicolau Lobato, Sábadu dadeer (11/04/2026), ne’ebé fó perigu ba aviaun sira tun no sa’e iha aeroportu refere. Foto/Repro

Ho insidente bird strike ka manu fuik soke aviaun Aero Dili iha Sesta, 11 Abríl 2026, bainhira atu take-off hale’u tuku 09:55 Otl, ho destinu voo Denpasar-Bali, Indonézia, rezulta aviaun Aero Dili A319 nia lamina rua mak aat, nune’e to’o agora halo hela reparasaun iha Aeroportu  internasionál Ngurah Rai (Denpasar-Bali) no presiza tan loron-ida ka rua atu bele rekupera.

Aviaun Aero Dili enfrenta beibeik ona insidente bird strike (dala-tolu ona) no tuir dokumentu ofisial Aero Dili nian ne’ebé Hatutan.com asesa katak iha insidente Sesta-ne’e, Aero Dili submete kedas karta reklamasaun ofisiál ho kategoria  “TOP URGENT” ba Prezidente Administrasaun Navegasaun Aérea Timor-Leste (ANATL, E.P), Romualdo António Soares da Silva no hato’o mós karta koñesimentu ba Prezidente Konsellu Administrasaun Autoridade Aviasaun Sivíl Timor-Leste (AACTL, I.P.), Zezinho António Gusmão ho Ministériu Transporte no Komunikasaun (MTK) atu bele tau konsiderasaun no buka solusaun ba kondisaun iha pista aeroportu prezidente Nicolau Lobato, liuliu duni tiha manu sira atu la bele tama iha pista.

Iha karta reklasaun ne’e, Aero Dili aprezenta mós koronolojia akontesimentu bird stike, katak durante faze aselerasaun aviaun  nian iha pista nia laran hahú hosi hasai travaun sira to’o nia atinji velosidade ne’ebé sufisiente atu semo (TO Roll) aviaun Aero Dili hetan atake husi manu ka manu soke aviaun nia sorin karuk, mas kontínua semo ba Denpasar

To’o iha Denpasar tun ho seguru, nune’e pilotu ne’ebé responsavel/Pilot in Command (PIC) no Engineer Onboard (EOB)  halo verifikasaun vizuál ba motór #1 no hetan ventiladór husi ida to’o tolu nia ai-sanak sira nakfera.

Karta reklamasaun Aero Dili nian ba ANATL,E.P. Foto/Repro.Espesiál

Ho insidente bird strike ne’e, Aero Dili  konsidera  ida-ne’e hanesan sériu ida kestaun ne’ebé iha potensiál atu fó perigu ba seguransa aviasaun nian. Tanba ne’e, Aero Dili husu investigasaun imediata ida kona-bá kondisaun sira pista nian iha momentu insidente nian, asaun koretiva atu asegura pista sempre livre husi manu no objetu perigozu sira seluk no propoin hadi’a prosedimentu sira monitorizasaun no mitigasaun manu-fuik nian iha área aeroportu nian.

Númeru  karta Aero Dili nian  ne’e AD-047/04/2026, loron 10 fulan-Abríl, ne’e ho esperansa boot atu ANATL bele fornese asaun lalais hodi asegura aviasaun seguransa iha Timor-Leste. Ida-ne’e perigu ba aviaun Aero Dili, liu-liu bainhira tun iha aeroportu Dili bele hamosu perigu signifikativu ba seguransa ba aviaun, pasajeiru sira no tripulasaun, no mós ba aviaun sira seluk ne’ebé maka hala’o operasaun iha Aeroportu Internasionál Prezidente Nicolau Lobato.

Informasaun ne’ebé Hatutan.com simu husi Aero Dili katak to’o agora autoridade komeptente sira, liuliu ANATL ho MTK seidauk hola medida represivu atu evita insidente bird strike  tanba iha loron tuir mai, Sábadu dadeer (11/04/2026),  aviaun Aero Dili ne’ebé atu semo husi Díli ba Denpasar tenke sai tarde, hein to’o minitu 20 iha Aeroportu Internasionál Prezidente Nicolau Lobato, tanba manu makikit barak mak semo grupu iha pista aeroportu nian.  

Jornalista:  Marcelino Toma