Hatutan.com, (20 Maiu 2026), Díli– Prezidente Repúblika, José Ramos-Horta, Kuarta (20/05/2026),  ezije ba autoridade kompetente Timor-Leste nian atu entrega fila-fali fujitvu Kalumban Mali ne’ebé halai husi justisa iha Timor Osidental ka Nusa Tenggara Timur (NTT)-Indonézia mai subar iha Timor-Leste to’o deskonfia falsifika dokumentu hodi hetan nasionalidade Timoroan ho identidade  Leonardo Benigno Tilman.

Lee Mós: Kazu Fujitivu Kalumban Mali, PGR Konfirma Iha ona Prokuradór Titulár Nia Liman

Prezidente Repúblika, José Ramos-Horta prezide selebrasaun tinan 24 restaurasaun independénsia iha Tasi-tou, 20 Maiu 2026. Foto/Média GPM

Prezidente Repúblika José Ramos hato’o ezijensia  ne’e  hodi reponde Jornalista sira iha ámbitu komemorasaun tinan 24 Restaurasaun Independénsia iha Tasi-tolu, 20 Maiu 2026.

Xefe Estadu  Timor-Leste ne’e afirma fujitvu Kalumban Mali alias Leonardo Benigno Tilman ne’e, nia  la   koñese ka la hatene  maka sé,  maibé se iha ema ruma hela iha territóriu ho ilegál,  ne’e iha  Polísia Sientífiku Ivestigasaun Kriminál (PCIC-sigla portugés) ho Polísia Nasionál Timor-Leste (PNTL) iha responsabilidade,  katak tenke kaptura  fujitvu  husi Indonézia ne’e bá sulan iha  prizaun Becora, ho hodi hein julgamentu.

“Ha’u la hatene sé-sé loos maka hela iha ne’e, sé fujitvu ne’e halai husi Justisa Indonézia tenke bá kaer hodi deporta fila-fali,  ha’u la hatene nia krime saída, maibé  sé nia komete krime iha Indonézia, ita la bele  simu, entrega fali  bá justisa Indonézia,” Ramos-Horta hateten.

Kona-bá Fujitvu Kalumban Mali halo asaun karidade hamutuk ho Prezidente Repúblika   ihá Hospitál Nasionál Guidu Valadares (HNGV),  Xefe Estadu ne’e konfirma katak,  empreza  balun  maka apoia uitoan iha asaun karidade ne’e.

“Maibé ha’u la hatene nia ne’e sé, dala ruma ema ida ka rua , ha’u la hatene ne’e sé, maibé buat ne’ebé nia oferese ka ajuda ne’e, la bale buat ida buat  uitoan de’it,  foin bele to’o US$100, depois fó  uitoan de’it sira ko’alia kedas, katak ha’u maka fó, ne’ebé  ha’u la hatene, sé maka fó,” PR Horta afirma.

Fujitivu Kalumban Mali ne’ebé deskonfia falsifika dokumentu hodi hetan nasionalidade Timor ho naran Leonardo Benigno Tilman, hola parte ativu iha atividade sosiál ka atividade karitativu Prezidente Repúblika, José Ramos-Horta nian.

Informasaun ne’ebé Hatutan.com rekolla husi fontes oioin, katak fujitivu Kalumban Mali ka deskonfia troka ona identidade Leonardo Benigno Tilman sai mós patrosinadór ba atividade karitativa Prezidénsia Repúblika nian, liu husi atividade sosiál Casa Civil  ne’ebé halo uma ba kbiit la’ek sira ho mós   lori apoiu nesesidade baziku (ai-han) ba fahe kbiit-laek sira.

Iha loron 18 fulan-Fevereiru ne’e, iha atividade Prezidente Repúblika (PR), José Ramos-Horta nian  ba vizita no fahe ai-han ruma ba pasiente dengue sira iha Ospitál Nasionál Guido Valadares (HNGV) akompaña mós husi Leonardo Benigno Tilam ka fujitivu Kalumban Mali.

Fó hanoin tan  fali katak iha Kuarta, 05 fulan-Juñu tinan 2023,  hale’u tuku 16:00 Otl, PCIC  halo kapturasaun no detensaun ba  fujitivu Kalumban Mali  iha nia rezidénsia Fomento, Díli.

Autoridade PCIC kaptura no detein fujitivu Kalumban Mali relasiona ho informasaun katak nia kaer ilegalmente dokumentu sidadania Timor nian  hodi troka nia naran ba  Leonardo Benigno Tilman husi Munisípiu Bobonaro.

Iha detensaun no kapturasaun ne’e, PCIC asegura dokumentu importante sira hosi Kalumban Mali alias Leonardo Benigno Tilman, hanesan sertidaun Nascimento ne’ebé deskonfia atribui  husi indivíduu balu iha Ministériu Justisa Timor-Leste, Billete Identidade Timor-Leste no sertidaun kazamentu husi Parókia ida ne’ebé hola parte iha Arkidioseze Metropolitana Díli.

Fujitivu Kalumban Mali nia orijen husi Lamaknen, Postu Administrativu Atambua, Provínsia Kupang, Timor Osidentál ka NTT (Nusa Tengara Timur).

Jornalista: Marcelino Tomae