Hatutan.com, (12 Juñu 2026), Díli– Prokuradór Jerál Repúblika (PGR, sigla portugés), Nelson de Carvalho, konfirma delaga kompeténsia inkéritu kazu korrupsaun balu ba Polísia Sientifiku Investigasaun Kriminál (PCIC).

Lee Mós: Polémika Avoka Inkéritu Kazu Korrupsaun iha CAC, Komisáriu CAC ho PGR iha Ona Komunikasaun

Prokuradór Jerál Repúblika, Nelson de Carvalho. Foto/Dok.Marcelino Tomae

Iha  loron 03 Fevereiru 2026, PGR Nelson de Carvalho, hasai despaixu ida hodi oriente ba  Prokuradór Repúblika Koordenadór hotu-hotu atu avoka (foti fila-fali) prosesu inkéritu sira kazu korrupsaun ne’ebé antes delega ona bá Komisaun Anti-Korrupsaun (CAC).

PGR Nelson de Carvalho, bá  Jornalista sira edifísiu Ministériu Públiku, Sesta (12/06/2026),  klairifka tan katak prosesu avokasaun kazu inkéritu korrupsaun sira ne’ebé   husi CAC barak sei   iha Ministériu Públiku.

“Prosesu avokasasun kazu korrupsaun  husi CAC  ne’e barak, balu agora ita delega fali bá PCIC,  balu nafatin iha Ministériu Públiku,  Prokuradór titulár sira maka asume rasik, hodi kontinua prosesu inkéritu,”  PGR Nelson de Carvalho hateten.

Razaun  Ministériu Públiku lakohi delega fali kazu korrupsaun sira bá CAC, PGR Nelson informa katak iha kestaun balu ne’ebé la permite nia atu deklara sai  bá públiku.

PGR   konfesa aktak  nia laiha konflitu interese ho Komisáriu Komisaun Anti-Korrupsaun (CAC), Rui Pereira dos Santos.

Nia dehan tan komentáriu sira ne’ebé públiku haree iha média ka husi parte CAC rasik, mak direitu no responsabilidade instituisaun ne’ebá atu fó hanoin, maibé nia rasik la  halo komentáriu kona-bá asuntu ne’e.

“Dala ruma ita boot sira haree iha komentáriu uitoan husi sira CAC rasik. Sira maka iha razaun atu halo komentáriu, maibé ha’u laiha,” Nelson de Carvalho hateten.

“Se ami iha problema pesoál, iha momentu 20  Maiu, nia tuur besik ha’u, ha’u hamrik no la’o tiha,”.

Kona-bá posibilidade atu delega fali kazu inkéritu krime korrupsaun bá CAC, PGR Nelson de Carvalho  informa  katak Ministériu Públiku sei halo avaliasaun uluk antes foti desizaun.

“Atu delega fali inkéritu kazu korrupsaun bá CAC, ita sei haree lai,” PGR Nelson de Calvalho haktuir.

Bazeia ba Despaixu  ho númeru 14/PGR/II/2026, Prokuradór Repúblika sira hetan orientasaun atu halo avokasaun prosesu sira iha prazu máximu loron lima (5) (tempu ne’ebá), hodi garante katak prosesu investigasaun hotu fila-fali ba kontrolu Ministériu Públiku.

Iha despaixu ne’e mós hatete katak depois  avokasaun, Prokuradór Repúblika Koordenadór sira tenke haruka kedas relatóriu ba Gabinete Prokuradór-Jerál Repúblika, hodi fó informasaun kona-ba prosesu sira ne’ebé avoka ona, inklui númeru úniku krime (NUC).

Medida ida ne’e bazeia ba dispozisaun Konstituisaun Repúblika Demokrátika Timor-Leste no Estatutu Ministériu Públiku, hodi reforsa Papél Ministériu Públiku iha prosesu investigasaun kriminál.

Despaixu ne’e mós distribui bá koordenadór unidade relevante sira no Prokuradór Repúblika hotu-hotu, atu asegura implementasaun efetiva husi medida ne’e.

Jornalista: Marcelino Tomae