Hatutan.com,  (22 Jullu 2026), Díli— Governu Fransa reafirma kompromisu atu aprofunda no diversifika kooperasaun bilaterál ho Timor-Leste iha área oioin, inklui defeza, ekonomia, turizmu, kultura no edukasaun.

Embaixadór Fransa naun-rezidénsia, Fabien Penone hasoru malu ho PM Xanana Gusmão iha Palásiu Governu, Kuarta (22/7/2026). Foto/Média GPM

Kompromisu ne’e hato’o hosi Embaixadór Fransa naun-rezidénsia, Fabien Penone durante enkontru ho Primeiru-Ministru (PM), Kay Rala Xanana Gusmão, iha Palásiu Governu, Kuarta (22/07/2026).

“Fransa reforsa ninia relasaun ho Timor-Leste. Ami koko atu aprofunda no diversifika kooperasaun, hosi defeza to’o ekonomia, inklui turizmu, kultura no apoiu bá universidade. Ami diskute programa sira no inisiativa foun ne’ebé Fransa lansa ho apoiu hosi Primeiru-Ministru,” Embaixadór Fabien Penone hateten.

Embaixadór Fransa ne’e mós destaka apoiu Fransa nian bá projetu Solar PV ne’ebé sei hala’o lansamentu ofisiál iha Laleia, Munisípiu Manatuto.

Projetu ne’e hetan investimentu hosi empreza Franseza no Japonéza, no sei kontribui bá aumentu produsaun eletrisidade no kria oportunidade empregu bá Timoroan sira.

Aleinde área enerjia, Fransa mós hahú programa sira iha área gastronomia liuhosi kolaborasaun entre empreza Franseza no empreza Timoroan sira. Iha tinan 2025, restaurante timoroan hamutuk 12 partisipa iha programa ne’e.

Kooperasaun ne’e refleta vontade nasaun rua nian atu hametin relasaun bilaterál no buka oportunidade foun bá dezenvolvimentu sustentável iha Timor-Leste.

Jornalista: Marcelino Tomae