Hatutan.com (21 Jullu 2026) Díli-Diretór Ezekutivu Hali Ba Dame (HABADA) Abel Amaral, husu Ministériu Públiku (MP) prosesu ho sériu ba autór ka ema sira ne’ebé ba presta ona  deklarasaun iha MP, kona-bá private jet “siluman” ho tipu Cessna Citation 700 Longitude (C700)  tun iha Aeroportu Internasionál Prezidente Nicolau Lobato (INPL), Kuarta, 01 Jullu 2026.

Lee Mós: Polémika Jet Privadu, Envolve Dirijente Na’in-10 no Na’in-hitu Hetan Ona Inkéritu Iha MP

Diretór Ezekutivu Hali Ba Dame (HABADA) Abel Amaral.

“Ami hanoin liga ho Jet Privadu ne’ebé ita hotu hatene mai tun iha Aeroportu Internasionál Prezidente Nicolau Lobato (INPL), Kuarta, 01 Jullu 2026, uza naran Xefe Estadu. Ami hanoin prosedimentu ne’ebé mak parte sira foti ne’e apropriadu ona, parte sira ne’ebé mak ligadu ho autorizasaun para Jet Privadu tun iha Dili ami hanoin notifikasaun ne’ebé ba ona iha Ministériu Negósiu Estranjeiru no Kooperasaun (MNEK) no Ministériu relevante sira, ne’e HABADA apresia,” Diretór Ezekutivu Hali Ba Dame (HABADA) Abel Amaral ba jornalista sira liu husi Konferensia Imprensa iha Díli, Tersa (21/07/2026).

HABADA husu labele fó notifikasaun de’it, kuandu identifika tenke fó sansaun administrativa ka sansaun disiplinar ruma tanba Timor ne’e la’ós kompañia unipesoal, Timor-Leste la’ós ema ida nia foti desizaun la’o dadaun.

“Ne’ebé ita husu prosesu ho sériu ba instituisaun ne’ebé mak fó lisensa ba aviaun Jet Privadu tun iha Aeroportu Dili. Ami mós preukupa ointuan tanba saida mak prosesu ne’e la’o hela aviaun ne’e husik livre”, HABADA kestiona.

Husu mós parte kompetente liu-liu Ministériu Públiku atu loke mós investigasaun ida-ne’e hasoru autoridade ida ne’ebé mak husik hela aviaun Jet Privadu ne’ebé tuir loloos iha prosesu nia laran asegura iha Aeroportu maibé husik sai.

“Tanba ida-ne’e toman at ida ne’ebé mak ita asegura fali ema sira ne’ebé mai uja ita nia alto entidade nia naran, depois prosesu seidauk hotu husik aviaun sai ami hanoin ida-ne’e mak ita preukupa”, HABADA preukupa.

Tanba ne’e mak husu Ministériu Públiku atu atensaun mós bá asuntu ida-ne’e, la’ós de’it ba sira ne’ebé mak hetan notifikasaun ba hatan ona iha MP hodi presta deklarasaun, husu mós tanba saida prosesu ne’e la’o hela aviaun Jet Privadu husik liu.

Jornalista: Juvinal Cabral dos Santos