Hatutan.com, (30  Agostu 2026), Dili- Partidu FRETILIN deside ona la aprezenta kadnidatura rasik ba eleisaun prezidensiál tinan 2027.

Desizaun partidu istóriku ne’e foti liuhosi reuniaun alargada membru Komite Sentrál FRETILIN (CCF, sigla portugés) ne’ebé lidera husi Sekretáriu Jerál FRETILIN nu’udár mós Prezidente Interinu FRETILIN, Mari Alkatiri iha Sede CCF, Díli,  Sábadu  (29/08/2026).

Pozisaun FRETILIN nian kona-ba la iha kandidatu rasik ba eleisaun prezidensiál tinan 2027 ne’e kontempladu mós hanesan parte ida husi rezolusaun ualu ne’ebé  embru Komite Sentral FRETILIN aprova.  

Iha komunikadu ne’ebé Hatutan.com asesu husi CCF informa iha sorumutuk nivel CCF ne’e halo  mós diskusaun hodi haree ho krítiku saida mak FRETILIN bele halo no tenki halo iha situasaun ida ne’e.

Mari Alkatiri hateten FRETILIN hakat iha dalan no tempu ida ne’ebé naruk tebes ona no liuhosi mudansa oin-oin iha tempu oin-oin iha faze diferente vida Timor-Leste nian ein-termu estrutura no polítika sira.

Sekretáriu Jerál FRETILIN Mari Alkatiri haktuir ho mudansa iha realidade ohin loron, CCF presiza atu diskitu no haree oinsá mak FRETILIN bele moderniza an hodi responde ba mudansa dezafiu hosi ne’e ba oin atu bele kumpriende di’ak liu povu no nasaun nia problema sira no fó resposta ne’ebé adekuadu.

Membru sira CCF halo diskusaun kle’an no nota ho preokupasaun boot katak Timor-Leste monu ona iha pegada krimi organizadu internasionál no tanba ne’e presiza atu harii konsiénsia komun ida kona-bá importánsia no urjensia atu salva Timor-Leste hosi situasaun ida ne’e molok sindikatu krimi organizadu sira halo State Capture ka domina Estadu Timor-Leste nia orgaun soberania sira.

Reuniaun  CCF mós aprova rezolusaun ualu ne’ebé atu tulun FRETILIN hala’o diak liu no foku ba prioridade sira prosesu modernizasaun partidu nian.

Rezolusaun sira ne’e mak mak hanesan Rezolusaun Nú. 01/CCF-5°/VIII/2026 hodi fo omenajen póstumu ba Saudozu Kamarada Presidente Francisco Guterres “Lú-Olo”, Rezolusaun Nú. 02/CCF-5°/VIII/2026 ne’ebé marka data ba FRETILIN nia Kongresu Nasionál ba da-6, Rezolusaun Nú. 03/CCF-5°/VIII/2026 ne’ebé deklara FRETILIN sei fó prioridade ba Partidu no Povu Timor-Leste no ba ida ne’e sei la aprezenta kandidatura rasik ba eleisaun Prezidensiál tinan-2027, Rezolusaun Nú. 04/CCF-5°/VIII/2026 ne’ebé harii Komisaun Nasionál Preparasaun no Organizasaun ba VI Kongres Nasionál FRETILIN nian no Eleisaun Jerál Dahitu, Rezolusaun Nú. 05/CCF-5°/VIII/2026 ne’ebé lansa kampaña “Militante Nu’udar Baze Apoiu Luta nian” no hahu kontribuisaun solidariu no ho konsiensia hodi militante sira tuir sira nia kbiit atu reforsa FRETILIN, Rezolusaun Nú. 06/CCF-5°/VIII/2026 ne’ebé aprova Regulamentu Disiplinár FRETILIN nian, Rezolusaun Nú. 07/CCF-5°/VIII/2026 kona-ba paridade demokrátika no kuota reprezentasaun feto nian, ne’ebé deside hodi hasa’e reprezentasaun feto nian ba 40% iha kargu eletivu hotu-hotu iha FRETILIN nia laran, Rezolusaun Nú. 08/CCF-5°/VIII/2026 kona-ba Transladasaun Restus Mortais Bispu sira nian mai Timor-Leste hodi saúda inisiativa transladasaun ba saudozu Amu Bispu sira; Dom Jaime Garcia Goulart, Dom José Joaquim Ribeiro, Monsiñor Martinho da Costa Lopes no Dom Alberto Ricardo da Silva. ***