Hatutan.com, (31 Agostu 2026), Dili-Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) detein membru Servisu Nasionál Intelizensia (SNI) na’in-rua no membru Unidade Patrullamentu Fronteira (UPF) na’in-ida tanba deskonfia komete kazu krime omesidiu simples.

Informasaun ne’ebé Hatutan.com rekolla husi fontes servisu sekreta sira haktuir atuasaun DSIK nian ne’e bazeia ba mandadu kapturasaun no detensaun husi Tribunál Judisiàriu Primeira Instánsia Suai (TJPIS) ho NUC 0016/26.CVSIL.

Daudaun ne’e suspeitu na’in-tolu ne’e iha hela detensaun Polísia Munisípiu Covalima hodi kumpre oras 72 nia laran molok aprezenta ba MInistériu Públiku.

Tuir informasaun katak detensaun ba membru SNI na’in-rua ho membru UPF ida-ne’e iha relasaun ho kazu vitima  feto ida ne’ebé mate to’o agora seidauk hetan nia isin-mate iha área Wetaba, Tilomar, Covalima, 25 Juñu 2026, ne’ebé tempu ne’ebá viral iha mídia sosiál katak feto ne’e lafaek maka tata.

To’o notísia ne’e públika parte kompetente sira seidauk bele fó informasaun detallu tanba sei iha hela invetigasaun no identifikasaun nia laran. (*)