Hatutan.com, (01 Setembru 2026), Díli – Restu mortál preladus Katóliku na’in-tolu, kompostu husi Dom Jaime Garcia Goulart, Dom José Joaquim Ribeiro ho Monseñor Martinho da Costa Lopes, Tersa (01/09/2026), to’o ona iha Timor-Leste.

Restu Mortál Dom Jaime Garcia Goulart, Dom José Joaquim Ribeiro ho Monseñor Martinho da Costa Lopes to’o iha Timor-Leste, 01 Setembru 2026. Foto/Espesiál

Sarani rihun ba rihun hamtuk ho ierarkia Igreja lokal Timor-Leste nian, ho Prezidente Repúblika no membru Governu sira, simu restu mortal preladus Katóliku na’in-tolu iha Aeroportu Internasionál Prezidente Nicolau Lobato, Díli ho entusiazmu no nakonu ho sentidu omenajen, orasaun no hananu tuir fiar Katóliku nian.

Prezidente Konferénsia Episkopál Timorense (CET), Arsebispu Arkidioseze Metropolitana Díli, Dom Virgílio Cardeal do Carmo da Silva, SDB, fó sasin katak restu mortál preladus Katóliku na’in-tolu iha Timor-Leste hatuur metin memória kona-bá istória, fiar Katóliku no kontribuisaun Igreja ba fundasaun RDTL.

“Ohin, sira mai iha ita-nia leet, ho de’it ona ruin no sinzas, atu ita bele halo memória, haktuir istória, hametin fiar no haboot unidade Timoroan nian,” Dom Virgílio Cardeal do Carmo da Silva, SDB hateten

Timoroan nu’udár fiar na’in haree katak prezensa espirituál sei hametin liután Timoroan  hotu nia unidade nu’udar Timoroan no Maromak oan.

Dom Virgílio Cardeal do Carmo da Silva, SDB  konfirma katak loron ida-ne’e marka ho sentidu kle’an iha fiar, memória istórika, venerasaun no rekonsiliasaun, liuhosi entrega ofisiál akta transladasaun restu mortál preladus na’in-tolu ba Konferénsia Episkopál Timorense (CET, sigla portugés).

Igreja simu dokumentu istóriku no restu mortál  sira ne’e husi Governu Timor-Leste,  tuir Dom Virgîlio Kardeal katak aktu ne’e la’ós de’it serimónia formál institusionál no protokolár, maibé mós sai sinál konkretu kona-bá servisu hamutuk no kolaborasaun entre Igreja no Estadu.

Nia hato’o agradesementu ba Governu Timor-Leste ba kolaborasaun iha prosesu transladasaun restu mortál preladus na’in-tolu husi Lisboa- Portugál mai to’o  Timor-Leste.

Hafoin Uma-Kreda simu tiha  preladus Katóliku na’in-tolu iha aeroportu translada ba Tasi-tolu no dudaun ne’e restu mortál preladus Katóliku na’in-tolu ne’e tau hamutuk ho Dom Alberto Ricardo da Silva iha Altar Santu, Tasi-Tolu, Díli. (*)