Jornalista: Felix Fernandes

Hatutan.com, (27 setembru 2026), Laleia-Populasaun iha Postu Administrativu Laleia Villa, inklui rezidente sira  2.700 iha suku Lifau no Haturalan, haksolok ho programa governu nian liu husi Ministériu Obras Públika (MOP) ho Bee Timor-Leste, Empreza Públiku (BTL,E.P) ne’ebé fasilita ona perfurasaun bee-moos ba sira-nia horik fatin.

Ministru Obras Publika, Samuel Marçal inaugura bee-moos iha Postu Administrativu Laleia, Manatuto, Sábadu (26/09/2026). Foto/média MOP

Tinan babarak rezidente sira  hamutuk na’in- 2.700  ne’ebé akomula  iha uma-kain 450 iha suku Lifau no Hatularan iha Postu Administrativu Laleia, halerik bee-moos.

Tinan barak sira tenke lori gerobak ka jerigen ba kuru bee iha mota-laran ka baku rasik iha uma ninin. Maibé bee refere la ijene .

Hahú Sábadu (26/09/2026), abitante sira  iha suku Lifau no Haturalan ne’ebé pertense ba aldeia neen; Aldeia Uma-Rentau, Lenao, Uma-Klalan, Ralan, Weboro no Uma-Iuk, bele ona asesu bee-moos liuhosi serimonia formal inaugurasaun bee-moos husi Ministru Obras Públika Sameul Marçal, hamutuk ho Vise Ministra Finansas, Regina de Jesus Sousa, Sekretariu Estadu Eletrisidade Bee no Saneamentu (SEEBS), Santos Noronha akompañia hosi Prezidente Konsellu Administrasaun BTL, E.P, Gustavo da Cruz.

Inaugura Projetu Konstrusaun Fornesimentu Sistema Bee-Moos iha Postu Administrativu Laleia ne’e nu’udar parte ida husi komemorasaun tinan-neen   BTL, E.P ho tema “Servi Povu ho Bee-Moos”.

“Ohin, ita mai inaugura Bee-moos no selebra mós aniversáriu BTL nian ba dala-neen. Ohin,Sekretáriu Estadu dehan katak bee limitadu, loos duni. Iha fatin balun hakarak bee-moos,maibé bee la iha. Tanba ne’e bee ne’e importante tebe-tebes ba ema nia moris,” Ministru Obras Públika Samuel Marçal hateten iha nia diskursu hanesan Hatutan.com  sita husi pajina ofisiál MOP nian, Domingu (27/09/2026).

Ministru hateten, bainhira bee laiha, bele fó impaktu boot ba saúde públika no moris loron-loron nian.

“Kuandu bee ne’e laiha, bele lori moras, bee la moos mós bele lori moras ba ita. Ita ema mós kuandu falta bee, isin la di’ak, saúde la di’ak. Entaun bee ne’e importante tebe-tebes,” Ministru Samuel Marçal haktuir.

Iha seremónia inaugurasaun no aniversariu BTL.E.P, Prezidente Ezekutivu BTL, E.P, Gustavo da Cruz hateten,  BTL kompleta tinan-neen  nia ezisténsia, ho esforsu tomak atu responde ba nesesidade bázika populasaun nian.

 “Espesialmente iha Laleia, ohin, ita halo selebrasaun ita-nia aniversáriu ba dala-neen. Kona-ba Laleia, ami hatene duni katak iha problema kona-ba rekursu bee,” Prezidenti BTL,E.P ne’e hateten.

Projetu ne’e ezekuta husi kompañia tolu, inklui kompañia lokál Laleia-oan rasik.

Projetu bee-moos iha Munisípiu Manatuto kontinua la’o, hanesan iha Laklubar no Lakló, no balun hein hela reparasaun trafo ho koordenasaun ho EDTL, E.P.

Prezidente Autoridade Munisípiu Manatuto, Luis Inâcio Henrique Fernandes, hato’o agradese ba Ministru MOP no Prezidenti BTL tanba fó atensaun ba Laleia no ba konektividade estrada iha Mane Lima, Laklubar.

“Hodi populasaun Laleia nia naran hakarak agradese ba Señor Ministru ho ekipa BTL,E.P. ne’eb’e ohin mai inaugura ona bee-moos. Alende ne’e Povu Laleia mós orgullu tanba BTL  bele mai selebra nia aniversáriu ba dala-neen hala’o iha sira-nia Postu Administrativu Laleia,”tenik PAM Manatuto.

Serimónia remata ho inaugurasaun simbóliku sistema bee-moos no observasaun direta ba funsionamentu rezervatóriu no kanalizasaun ba komunidade.

Projetu Sistema Bee-Moos iha Postu Administrativu Laleia, Munisípiu Manatuto fahe ba pakote tolu (3) hanesan; pakote dahuluk, konstrusaun sistema fornesimentu bee-moos ne’ebéimplementa husi Kompañia Reza Construction Lda, ho montante kontratu hamutuk US$565.203,55.

Pakote daruak, fornesimentu no instalasaun Tanki Rezervatóriu (Liner Tank) ne’ebéimplementa husi Kompañia Glariato Unipesoal Lda ho montante kontratu hamutuk US$138.333,75.

Pakote datoluk, perfurasaun bee-moos ne’ebé implementa husi kompañia H2O Pump and Power ho montante kontratu hamutuk US$61.320,25.

Totál montante kontratu ba pakote tolu (3) ne’e US$764.857,55  ne’ebé aproveita rekursu bee mai husi rai-okos (perfurasaun) ho kapasidade 20 L/s.

Sistema fornesimentu bee-moos fahe ba Zona haat (4) hodi kobre área sira iha kapitál Postu Administrativu  Laleia, inklui suku Lifau no Haturalan, ho aldeia neen; Aldeia Uma-Rentau, Lenao, Uma-Klalan, Ralan, Weboro no Uma-Iuk.

Instalasaun kanu transmisaun hamutuk 1,7 km no kanu distribuisaun hamutuk 19,3 km. Instalasaun Liner Tank hamutuk tolu (3): Liner Tank ho kapasidade 409 m³ unidade ida (1) – inklui lutu 15x15m, Liner Tank ho kapasidade 48 m³ unidade rua (2) – inklui lutu 9x9m.

Instalasaun metru kontadór ba uma-kain hamutuk 450 ho populasaun hamutuk 2.700. Sistema ne’e halo mós koneksaun ba instituisaun públiku sira hanesan Postu Saúde, Eskola, PNTL Esquadra Laleia, Igreja. (*)