Hatutan.com, (23 Dezembru 2021), Díli—Governu liuhosi Ministériu Finansas (MF), realiza ona pagamentu izénsaun propinás iha segundu semestre nian, ba universitáriu sira iha Institutu Ensinu Superiór lima (5) ho valór orsamentu hamutuk millaun $3,7, alende ne’e MF mós utililiza osan ho montante milliaun $10-resin hodi halo pagamentu ba pesoál saúde liña frente.

Estudante Universidade Nasional Timor Lorosa’e (UNTL) Partisipa iha Asaun Sensibilizasaun Kona-bá Lei Protesaun Sivíl, ne’ebé organiza hosi Sekretáriu Estadu Protesaun Sivíl no koopera ho UNTL, iha Auditóriu Liceu UNTL, Díli (06/12). Foto/UNTL.

Institutu Ensinu Superiór públiku no privadu sira ne’ebé hetan ona pagamentu hosi governu mak hanesan, Universidade da Paz (UNPAZ), ho montante millaun $1,1, Universidade Nasionál  Timor Lorosa’e (UNTL) ho montante $808,395, Institute of Business (IOB) ho montante $618,580, Universidade Oriental Timor Lorosa’e (UNITAL) ho montante $603,165, no Dili Institute of Technology (DIT) ho montante $552,726.

Antes ne’e, iha loron 16 fulan-Jullu 2021, Ministériu Finansas mós realiza ona pagamentu izénsaun propinas primeira semestre ba estudantes Institutu Ensinu Superiór ho montante millaun $5,6.

“Totál númeru estudantes Ensinu Superiór ne’ebé mak hetan benefísiu hamutuk rihun-neen-nulu resin iha Ensinu Superiór hamutuk 18,” komunikadu ne’ebé Hatutan.com, asesu iha Kinta (24/12/21).

Iha fulan-Maiu 2021, Prezidente Repúblika promulga Lei Orsamentu Jerál Estadu (OJE) Retifikativu. Ho promulgasaun ne’e fó biban ba Governu hodi finansia medidas sosiu-ekonómiku neen mak hanesan, Apoiu ba empregu, Moratoria de Crédito, Izensaun pagamentu propinas ba estudantes ensinu superiór no subsídiu internet ba estudantes ensinu superiór, Sosa produtu alimentár husi produtór lokál, Finansia operasaun Sentru Integradu Jestaun Krize, no Finansia suplementu remuneratóriu ba traballadór liña-frente sira.

Pagamentu ba Pesoál Saúde Liña Frente

Iha Kuarta, 22 Dezembru 2021, Ministériu Finansas (MF) mós halo ona pagamentu ba pesoál liña frente sira iha Ministériu Saúde (MS) nian, ho montante orsamentu hamutuk milliaun $10,9.

Ministériu Finansas liuhusi Sekretariadu Tékniku Fundu Covid-19 realiza ona pagamentu suplementu remuneratóriu liña-frente pesoál saúde hamutuk 3.308 ho montante totál millaun $10,9.

Realizasaun pagamentu ida ne’e, governu atribui uluk ba pesoál saúde ne’ebé serbisu iha Hospitál Referrál Suai, Maliana, Maubessi, RAEOA, Servisus Saúde Munisipál (SSM) Viqueque, Covalima, Baucau no Lautém inklui SAMES, Servisu Nasionál Ambulánsia & Emerjénsia Médika no Pillar 1,3,4,5,6,7,8,9. Pagamentu hirak ne’e kobre períodu fulan-janeiru to’o fulan-setembru 2021.

Oras-ne’e, Ministériu Finansas kontinua prosesa pedidu pagamentu ba Servisu Saúde Munisipiu Aileu, Ainaro, Bobonaro, Manatuto, Ermera, Likisá no Manufahi inklui Pilar 2 no sei realiza pagamentu iha fulan ida-ne’e nia laran.

Antes ne’e iha 30 fulan-novembru, Ministériu Finansas mós realiza ona pagamentu suplementu remuneratóriu liña-frente pesoál saúde hamutuk 2.414 ho montante totál millaun $7,4 ba pesoál saúde ne’ebé serbisu iha SSM Díli, HNGV no Hospitál Referál Baucau.

To’o iha 22 Dezembru 2021, horisehik, Ministériu Finansas ezekuta ona pagamentu suplementu remuneratóriu ba pesoál liña frente sira ho valór orsamentu milliaun $33,9 (65%), hosi orsamentu alokadu ba liña frente sira hamutuk milliaun $51,9.

Taxa ezekusaun reál Fundu Covid-19 nian, to’o iha 22 Dezembru horisehik, atinje ona milliaun $162,1 (56%), hosi orsamentu alokadu milliaun $287,6.

Jornalista: Regério Pereira Cárceres