Hatutan.com, (21 Janeiru 2022), Díli- Organizasaun sosiedade sivíl Asian Justice and Right (AJAR) husu ba  Komisaun Anti-Korrupsaun (CAC) ho Ministériu Públiku (MP) atu sériu halo investigasaun kle’an ba kazu projetu instalasaun Set-top Box/dexodificador  Rádiu Televizaun Timor-Leste, Empreza Públiku (RTTL,E.P) ne’ebé deskonfia envolve Ministru Asuntu Parlamentar no Komunikasaun Sosiál (MAPKOMS), Francisco Pereira da Costa Jerónimo.

Notísia iha Relasaun: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Diretór Ezekutivu AJAR, José Luis Oliveira. Foto/Espesiál

Iha kazu ne’e, deskonfia MAPKOMS nu’udar mós Prezidente Federasaun Futeból Timor Leste (FFTL), Francisco Pereira da Costa Jerónimo,  komete pratika “abuzu poder” hodi estabelese kontratu projetu instalasaun Set-top Box/dexodificador RTTL,E.P ba empreza DILI ENTERNAL INNOVATION INFORMATION, Lda, ne’ebé nu’udar sósiu husi Fan Yuanxiang ho Melánia da Silva Fernandes Capela.

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares (Acão) husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timor-oan ne’ebé hala’o mós serbisu loron-loron nian hanesan Sekretaria Prezidente Federasaun Futeból Timor Leste (FFTL).

Iha Certidão do Registo Comercial hosi SERVE,I.P  hatudu shares ka kuota ba empreza DILI ENTERNAL INNOVATION INFORMATION, Lda, nia kompozisaun, hanesan Fan Yuanxiang iha sósiu ka kuota 60% no Melánia da Silva Fernandes Capela iha 40% husi total Kapitál Sósiu $10,000.00. 

Tuir Estatutu DILI ENTERNAL INNOVATION INFORMATION, Lda kona-bá Kontratu Konstitutivu, Kuota Limitada ba Sosiedade, iha artigu 4 (Kapitál Sosiál)  hateten, kapitál sosiál ho inisiál integra ba osan no depozita ona ho valór nominal $10,000.00 ba nain husi empreza DILI ENTERNAL INNOVATION INFORMATION, Lda ne’ebé reprezenta kuota hanesan tuir mai:

1. Kuota ida ho valor nominal $6,000.00 vale ba 60% mai husi Fan Yuanxiang
2. Kuota ida ho nia valor nominal $4,000.00 vale ba 40% ho nai na’in ba sósiu ne’e mak Melánia da Silva Fernandes Capela.

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Diretór Ezekutivu AJAR, José Luis Oliveira, Sesta (21/01/2022), iha nia serbisu fatin ba Hatutan.com, esplika katak kazu ne’e iha pratika abuzu poder no iha indikasaun forte ba korrupsaun tanba ne’e presiza iha investigasaun hosi autoridade kompetente sira.

“Iha mós indikasaun administrasaun danoza katak administrasaun ne’ebé la diak tamba fó prejuizu ba Estadu tamba sira konsede projetu ne’e ema ne’ebé iha relasaun besik. Husi faktu ne’ebé mídia Hatutan.com  levanta hatudu katak iha indikasaun forte ba korrupsaun no ita hein CAC ho MP,  inklui Inspetór Interna sira  iha ministériu relevante bele hahú hakle’an sira-nia investigasaun.” José Luis Oliveira hateten.

José Luis Oliveira esplika, ema ida ne’ebé mak iha  relasaun besik ho projetu na’in  no depois hetan fali ajudikasaun direita ba projetu ne’e, klaru hatudu momos iha konflitu interesse.

Ho pratika ne’ebé iha, José Luis afirma, hatudu autoridade ministériu relevante viola ona prinsípiu jerál husi Dekretu Lei Nú.10/2005 kona-bá Rejime Jurídiku Aprovizionamentu (RJA), liuliu artigu 31 ho 32 kona-bá asegura prosesu sira dok husi konflitu interese no  tenke justu atu asegura  kualidade projetu di’ak mas iha faktu hatudu katak ema ne’ebé hetan projetu liu husi dalan adjudikasaun direita iha relasaun ho MAPKOMS nu’udar mós Prezidente Federasaun Futeból Timor Leste (FFTL).

“Inspetór Interna simu saláriu atu halo saida? atu prevene pratika sira-ne’e la bele mosu, agora ida-ne’e mosu signifika nia partisipa mós iha kazu ne’e tamba nia husik hela  buat ne’e akontese signifika violasaun omisaun katak nia viola nia obrigasaun hodi husik buat ne’e akontese,” José Luis Oliveira.

José Luis Oliveira hateten medida la’ós de’it ba ema ida foti desizaun ba projetu ne’e hodi fó vantajen ekonomiku ba ema ne’ebé iha relasaun, maibé bele mós kona ba inspetór internu ministériu nian tamba nia la hala’o nia kna’ar ho di’ak no husik hela aktu korrupsaun ne’e akontese iha ne’ebá nune’e inspetór mós bele hetan sansaun administrativa.

“Projetu públiku sira ne’e tenke liu husi konkursu públiku no adjudikasaun direita ne’e kuandu projetu ne’e emerjénsia mais karik emerjénsia mós tenke iha verifikasaun oinsá emerjénsia. Ita hein entidade relevante sira nian prosesu investigasaun,” José Luis Oliveira hateten.

Jornalista: Vito Salvadór