Hatutan.com, (20 Janeiru 2022), Díli—Tuir relatóriu mensál ne’ebé fó-sai hosi Policia Científica Investigação Criminál (PCIC), liuhosi Servisu Pikete no Prevensaun, katak, durante fulan-Dezembru 2021, rejista kazu krime hamutuk 58.

Portavós PSIK, Octavio da Costa Araújo. Foto/Hatutan.com.

“Dadus jerál ba investigasaun kriminál iha fulan Dezembru, Servisu pikete no Prevensaun, simu ho totál kazu hamutuk 58. Kazu krime sira ne’e kona-bá Burla no Ofensas integridade fízika,” Portavós PCIC, Octavio da Costa Araújo, hateten iha karta komunikadu ne’ebé Hatutan.com asesu,Kuarta (20/01/2022).

Notisia iha Relasaun:PCIC Rejista Keixa 38, Maiória Krime Furtu Agravadu

Kazu sira ne’ebé PCIC simu delegasaun kompeténsia hosi Tribunál Distritál Díli (TDD), hamutuk 15. Tipu kazu sira ne’e maka, krime Burla no Falsifikasaun Dokumentu. Relatóriu Interkalár ne’ebé PCIC halo, hamutuk 12 no Relatóriu finál ho kazu hamutuk 22.

Prosesu sira ne’ebé tranzmita ba fulan-Janeiru 2022, hamutuk 55. Mandatu Detensaun ne’ebé emite hosi TDD, ho totál haat, no kazu sira ne’e kona-bá krime Fraude fiskál, ne’ebé transmite ba fulan Janeiru tinan 2022.  Pedidu paradeiru ne’ebé emite hosi TDD, iha kazu hamutuk haat, maibé foin ezekuta kazu ida.

Alende ne’e, durante Dezembru, PCIC enkamiña mós kazu hamutuk lima (5), hodi ba hala’o mós iha Laboratóriu Policia Ciêntífica-Policia Judiciária (LPC-PJ), inklui hala’o ezame ba toxikolójia, hamutuk kazu haat (4), iha nasaun Portugál, maibé oras-ne’e sei pendente.

Ezame ba dokumentus iha ida, ezame pendente iha Laboratório Policia Ciêntífica-Policia Ciêntífica Investigação Criminál (LPC-PCIC).

Ezame sira ne’ebé PSIK halo iha lokál krime nian, hamutuk neen, ba kazu omesídiu neglijente no kondusaun perigózu, inséndiu, ameasa, furtu simplés, roubu, no violasaun seksuál.

PCIC mós rekolla identifikasaun judisiária no lofoskópia, ba kazu hamutuk 25 mak hanesan, burla agravadu, brankementu kapitais, falsifikasaun dokumentus, kondusaun sein karta, roubo, furtu, tráfiku umanu, violasaun seksuál no ofensas integridade fízika agravadu.

Serbisu INTERPOL iha TL

Iha fulan Dezembru, NCB INTERPOL Díli halo levantamentu dadus iha pontu entrada fronteira sira mak hanesan, Rejiaun Administrativa Espesial Oecusse Ambeno (RAEOA), tanba eziste mós Postu ba Servisau Migrasaun (SM) sira nian.

Objetivu hosi levantamentu ba dadus sira iha fronteira ne’e, hodi haree sistema kontrolu iha pontu entrada no saida.

Nune’e, ba futuru  bele instala no halo koneksaun ba sistema baze de dadus iha edifísiu Servisu Migrasaun (SM) Palaban, Aeroportu Internasionál Oecusse, Rota do Sándalo, Postu Integradu Sakato, Postu Integradu SM iha Bobomete, Postu SM iha Pássabe, no Postu Intergradu Citrana.

Progresu ezekusaun OJE 2021 iha PCIC 98%

Haktuir ba relatóriu ne’ebé Hatutan.com asesu iha karta komunikadu PCIC nian, katak, hosi montante Orsamentu Jerál Estadu (OJE), tinan 2021 nian ne’ebé atribui ba PCIC, to’o iha fulan Dezembru, atinje ona 98%.

Hosi persentajen ne’e, fahe ba kategória Saláriu no Vensimentu, ho valór hamutuk $23,608,26. Kapitál Menór, iha $8,089.00. Bens no Servisu $17,195,11.

Nune’e, totál ezekusaun OJE 2021 ba instituisaun PCIC, hamutuk $48,892,37, ho pursentu 98 (98%).

Jornalista: Rogério Pereira Cárceres