Hatutan.com, (26 Janeiru 2022), Dili-Prezidente Organização Filiadas da Fretilin (OFILIN), José Manuel “Nakfilak”, hamutuk ho nia camarada sira iha OFILIN hahú halo servisu iha baze hodi lori vitória ba Francisco Guterres “Lú Olo” iha eleisaun  prezidensiál, 19 Marsu 2022.

Notísia iha Relasaun: Apoiante 125.000 Garante Lori Fila Lú Olo Ba “Aitarak Laran”

Konferénsia imprensa OFILIN, 26 Janeiru 2022. Foto/Hatutan.com

Prezidente Organização Filiadas da FRETILIN (OFILIN), José Manuel “Nakfilak”, hateten, OFILIN hanesan organizasaun masa partidu Frente Revolusionáriu Timor-Leste Independente (FRETILIN) ha devér tomak enfrenta batalla hodi lori vitória.

“Ami bele dehan, dala-ruma ita la liu primeira ronde karik. Tanba ami la’ós koalia individual, ami ko’alia estruturál. Ami nia kandidatura Francisco Guterres “Lú Olo” sei manan iha eleisaun prezidensiál iha primeira ronde,” José Manuel “Nakfilak”, hateten, hodi hatán ba pergunta hosi jornalista sira liuhosi konferénsia imprensa, iha Sede OFILIN, Otél Luz Clarita, Dili, Kuarta (26/01/2022).

“Segunda ronde ba ami ne’e, laiha. Tanba ami hateten tiha, ami halo tiha ona mapeamentu forsa sira nian, ami haree hotu ona. Ne’ebé ami iha esperansa tomak, prezidente Lú Olo, iha primeira ronde, no simu pose iha 20  maiu 2022,” José Manuel Nakfilak, afirma tan.

Kona-bá razaun OFILIN apoia “Lú Olo” atu re-kandidata aan, tanba sira hatene di’ak perfíl atuál Prezidente Repúblika Francisco Guterres “Lú Olo” nian. Sé mak “Lú Olo”, no durante nia mandatu tinan lima ne’e, saida mak nia halo.

Tuir Nakfilak, durante mandatu tinan-lima, Lú Olo salva ona Timor-Leste hosi krize boot rua. Ho krize boot rua-ne’e mak fó ba sira-nia kapasidade atu fó fila-fali ukun ba Lú Olo.

Ko’alia kona-bá Serka Sanitária (SS), bainhira perkore took mundu hosi média sosiál sira, haree katak , persentajen ba óbitu (mete) iha COVID-19, TL menus liu, kompara ho rai viziñu sira, hanesan Austrália no Indonézia ne’ebé dezenvolvidu tebes.

“Hira mak ita halo, mate ne’e la to’o atus-rua. Sé nia desizaun, Lú Olo. Liuhosi konsulta ne’ebé nia halo iha konsellu estadu, konsellu superior defeza no seguransa, hosi proposta ne’ebé konsellu  estadu fó, hosi primeiru-ministru, nia hola desizaun. Krize polítika ida seluk, manán mós ita sobu, lakon mós ita sobu, la ukun mós, ita sobu nafatin. Krize polítika rua ne’e mak Lú Olo konsege ultrapasa. Buat rua ne’e mak fó ba ita atu hateke hodi fó fila-fali ita-nia konfiansa ba nia hodi kontinua sai  xefe estadu,” José Manuel Nakfilak hateten.

OFILIN mós apresia, no respeita timoroan hotu ne’ebé iha vontade tuir lejitimidade demokrátika hodi kandidata aan ba PR periodu 2022 to’o 2027.

OFILIN totálmente fó apoia ba prezidente ida ne’ebé hatuur misaun xefe estadu ho loloos tuir espíritu no letra ne’ebé hatuur iha artigu 74, Konstituisaun RDTL.

OFILIN apoia kandidatu ida ne’ebé kumpre regra administrativa no rekizitu formál no legál sira no juridikamente elejivel nu’udár kandidatu ba PR.

Prezidente OFILIN ne’e, husu ba estrutura tomak OFILIN nian hosi nasionál to’o iha sub-nasionál no baze atu mobiliza rekursu tomak organizasaun nian hodi apoia totál no kompleta ba kandidatura Francisco Guterres “Lú Olo” nian iha eleisaun prezidensiál mai.

José Manuel Nakfilak, fó hanoin ba membru sira atu asegura nafatin pás, estabilidade no seguransa iha ida-idak nia hela fatin, nu’udár responsabilidade no jestu ne’ebé aas hodi fó garantia ba realizasaun festa demokrátika ne’e.

Jornalista: Rogério Pereira Cárceres