Hatutan.com, (08 Fevereiru 2022), Díli—Polísia Nasionál Timor-Leste (PNTL), liuhosi Komandu Munisípiu Díli, planeia ona hodi intensifika ka hasa’e volume atividade operasaun la’o ain, inklui ho karreta iha tempu kalan, hodi evita kríme iha kapitál nasaun.

Unidades Espesial Polisia (UEP) liu husi Seksaun Comando Operasaun Espesial (COE) hala’o treinamentu kona-bá Armas (21/10/2021). Foto/PNTL.

Komandante PNTL Munisípiu Díli, Superintendente Xefe Polísia, Hendrique da Costa, hateten Intensifikasaun ba operasaun ne’e tanba iha Sábadu 29 Janeiru 2022 oras madrugada, mosu kazu insidente ida, rezulta vítima Nuncio Soares, hetan sona hosi suspeitu JV iha Aldeia 12 Outubro, Suku Comoro, Postu Administrativu Dom Aleixo, Munisípiu Díli. 

Notisia iha Relasaun:PNTL Buka-tuir Autór Oho António de Jesus iha Elemloi 

Alende ne’e, iha Segunda 07 Janeiru 2022 maizumenus tuku 01:13 oras madrugada, mosu tán kazu omesídiu agravadu ida ba matebian António de Jesus Soares (25) iha área Delta-III, Elemloi, aldeia São José Aimeti-Laran, Suku Comoro, Postu Administrativu Dom Aleixo.

“Loos duni, iha semana kotuk mosu insidente balun. Ida mak hanesan iha Elemloi  sona ema ida mate. Ita implementa ona, tantu ita nia komandu munisipiu Dili, nomos unidade espesial rasik, halo atividade patrullamentu la’o ain, no mós ho karreta. Ida-ne’e ita sei intensifika liu tán, ka hasa’e liután ita nia atividade liu-liu ba patrulla la’o ain ho mós patrulla karreta,” Superintendente Xefe Polísia, Hendrique da Costa, hateten ba jornalista-sira, iha Komandu Caicoli, Tersa (08/02/2022).     

Atividade operasaun iha tempu kalan ne’e, Komandu Díli nia medida prevensaun maka sempre konjunta ho Unidade Espesial Polisia (UEP), Unidade Polisia Marítima (UPM), forsa rezerva, inklui Servisu Informasaun Polisia no Militár, hodi tama to’o fatin sira ne’ebé identifikadu iha risku ba konflitu.

“Atividade prevensaun ninian patrullamentu sira, kalan liu-liu iha tuku 22:00 ba leten, ita nian patrulla sempre halo. Ita hatene, agora tama ba iha tinan eleisaun, atividade sira hanesan ne’e, dala-ruma sei kampaña ninian, no agora halibur-malu, ida ne’e halo komunidade sira sente tauk duni,” Hendrique informa tán.

Ekipa servisu sekreta sira seluk hanesan Servisu Informasaun Polisia Munisipiu Dili, Servisu Informasaun Nasionál, ho J2, sempre halo movimentu iha tempu kalan, nomós loron, hodi nune’e bele informa fali ba ekipa patrulla sira atu responde ho lalais.

Jornalista: Rogério Pereira Cárceres