Hatutan.com, (28 Abríl 2022), Díli—Polísia Nasionál Timor-Leste (PNTL), liuhosi Komandu Munisípiu Díli, iha Kinta, 28 Abríl hala’o avaliasaun ba servisu sira seguransa nian durante ne’e kampaña eleitóral hosi kandidatu Prezidente Repúblika (PR) sira no eleisaun Prezidensiál segunda volta nian iha 19 Abril deskobre katak, iha problema prinsipál tolu.

Problema tolu ne’e mak hanesan, rekursu umanu sei menus, koordenasaun entre PNTL ho órgaun eleitorál Sekretáriadu Tékniku ba Administrasaun Eleitorál (STAE) no Comissão Nacionál de Eleições (CNE) seidauk másimu, Transporte ba operasaun la to’o, nune’e mós koordenasaun seguransa entre PNTL ho autoridade lokál sira seidauk másimu. 

Lee Mós: Xefe Estadu Lú Olo Apresia PNTL Ne’ebé Asegura Eleisaun Prezidensiál

Advertisement

“Ita hetan mós informasaun hosi komandante eskuadra sira nomós seksaun sira, kona-bá ita nia frakeza sira bainhira hala’o servisu ba seguransa. Rekursu umanu ne’ebé mak la sufiente, sentru votasaun barak, depois populasaun iha Dili mós barak, eleitór mós barak fatin problema mós barak. Maibé ita nia rekursu ne’e, mínimu tebes. Ida ne’e, nia konsekuénsia halai ba iha enérjia ita nia membru sira nian, tanba sira serviu la para ka laiha tempu deskansa. Ida ne’e, prejudika tebes ba sira nia saúde,” Komandante PNTL Munisipiu Dili, Superintendente Xefe Polisia, Henrique da Costa hateten ba jornalista sira iha kna’ar fatin Caicoli, Kinta (28/04/2022).

Tanba ne’e Komandu Dili sei haree ba oin atu bele husu tán rekuru ne’ebé mai hosi Komandu Jerál, hodi apoia iha munisípiu Díli.

Problema daruak maka, presiza hadi’a koordenasaun servisu entre PNTL ho STAE ho CNE, tanba durante ne’e identfika katak liña komunikasaun seidauk másimu no oinsá mak atu bele foti medida seguransa ruma.

“Ita iha problema transporte. Antes ne’e ita hetan apoiu hosi Komandu Jerál liuhosi karreta ne’ebé mak governu ajuda no iha mós karreta balun ne’ebé mak ita aluga, maibé la sufisiente ba eskuadra sira, tanba karreta ne’ebé mak mai ne’e ita la fó to’o ba eskuadra sira. Ita fó de’it ba iha forsa rezerva nomós tránzitu inklui Servisu Informasaun Polisia,” Komandante Henrique informa tán.

Iha avaliasaun ne’e identifika katak, durante kampaña eleisaun Prezidensiál ne’e iha área seguransa nian la konsege involve mós hosi autoridade komunitáriu sira hanesan Xefe Suku ho aldeia, membru Konsellu Polisiamentu Komunitáriu (KPK) sira. Nune’e, bainhira mosu problema ruma, difísil hetan konfirmasaun.

Advertisement

Tuir dadus hosi Komandu PNTL Munisípiu Díli, durante eleisaun Prezidensiál primeira volta, rejista insidente hamutuk haat no iha segunda volta, rejísta insidente ida de’it. Maibé insidente ida-ne’e la tama iha krime eleitorál tanba akontese fora hosi oras kampaña ninian.

Jornalista: Rogério Pereira Cárceres