Hatutan.com (09 Fevereiru 2022) Díli—Tribunál Distritál Díli, liu hosi alegasaun Ministériu Públiku (MP) Prokuradór Rogério Viegas, husu ba Tribunál atu aplika pena prizaun tinan rua suspende tinan tolu no indeminizasaun $460 ba eis Administradór Postu Ataúro, arguidu Manecas da Conceição Soares no Xefe Sentru Saúde Postu Ataúro, arguidu Januário Domingos Cabeças Soares.

Sala julgamentu Tribunál Distritál Díli. Foto/Hatutan.com.

Alegasaun  ne’e relasiona ho subsídiu ka indemizasaun ba ai-horis komunidade nian ba konstrusaun kampu aviasaun temporáriu iha Ataúro iha tinan 2014.

Notisia iha Relasaun:TDD Rona Sasin ba Kazu Eis Administradór Ataúro

Razaun MP husu pena suspensaun tinan tolu no indenimizasaun ne’e, tanba aktu ne’ebé imputa ba arguidu na’in-rua prienxe rekezitu krime nian maske iha faktus balun arguidu sira laiha koñesimentu.

Provadu mós katak, iha tinan 2014 kuandu Ministériu Saúde halo pagamentu ba projetu ne’e, iha osan kuaze $700 mak la uza, tanba tuir informasaun katak hosi komunidade afetadu 44 iha uma-ka’in tolu mak la simu osan no osan ne’e tau de’it iha Brankas Ministériu Saúde Ataúro.

Hafoin alegasaun, juiz prezide adi’a hikas julgamentu ba loron seluk hodi rona leitura sentensa.

Antes ne’e, tuir akuzasuan hosi MP katak, arguidu na’in-rua halo konvokatóriu ho Xefe Suku lima hamutuk ho komunidade ne’ebé afeita hosi konstrusaun kampu aviasaun provizóriu iha Postu Ataúro, no liu hosi enkontru hirak-ne’e maioria to’os na’in konkorda atu hasai sira nia ai-horis, maibé husu atu indeminiza ai horis mak hanesan hudi, nu’u, haas, sabraka, goiavas, romaun, ai-ata, ai-dila, kulu, derok, ai-teka no ai-kameli ne’ebé antes ne’e sira kuda iha kintál.

Iha loron 04 Janeiru 2014, Ministëriu Saúde liu hosi Servisu Distritál Saúde Díli (SDS), entrega osan subsídiu ho montante $5.700, ba arguidu na’in-rua hodi fahe ka distribui ba uma-ka’in ne’ebé afetadu hosi konstrusaun kampu aviasaun temporáriu iha Ataúro ho totál uma-ka’in hamutuk 44.

Iha loron 06 Janeiru 2014, arguidu na’in-rua hamutuk ho eis Xefe Suku Beloi no Xefe Suku Villa Maumeta, realiza enkontru ho família uma-ka’in hamutuk 44 afetadu hodi diskuti kona-bá mekanizmu distribusaun osan no foos tonelada tolu ne’ebé atu distribui ba família uma-ka’in hirak ne’e.

Bazeia ba rezultadu enkontru ne’e, konsege kria mekanizmu distribuisaun osan no foos subsídiu ne’e bazeia ba to’os nia medida no volume ai-horis no afeta, tanba ne’e arguidu sira deside kada uma-ka’in ida sei hetan $120 no foos saka rua ba família hamutuk 44, maibé ba kategoria hirak ne’ebé halo to’os bo’ot sei hetan $300 kada uma-ka’in.

Hosi lista pagamentu ba uma-ka’in 44, identifika katak iha família tolu mak la simu osan subsídiu ne’e mak hanesan Plasidio Lisboa, la simu osan ho montante $300, Virgílio Hornai ho montante $200 no Alcina Baptista la simu $120, nune’e totál subsídiu ne’ebé uma-ka’in tolu la simu hamutuk $620 no foos saka neen.

Alende ne’e, iha uma-ka’in hanesan Diogo Soares Alves la simu mós osan ho montante $120, Fernando da Conceição simu de’it foos maibé la simu osan $120, Norberto Soares la simu osan $120, Paulina Araújo Tilman simu de’it $20 falta $100, tanba ne’e totál osan ne’ebé arguidu sira la selu hamutuk $1.080, inklui uma-ka’in rua hanesan Cleopas Torne no João Baptista ne’ebé naran laiha lista subsídiu.

Osan ho montante $1.080 ne’ebé arguidu sira la halo pagamentu ba uma-ka’in neen ne’e, arguidu sira la devolve ba kofre Estadu, maibé rai de’it iha uma durante tinan lima, hodi uza ba partikulár no foin entrega osan ho montante $620 ba MP iha loron 23 Dezembru 2019 falta $460, maka seidauk devolve ba kofre Estadu.

Alende ne’e, iha loron 02 Maiu 2014, arguidu Manecas da Conceição Soares nu’udár Administradór Postu Ataúro liu hosi enkontru ho to’os-na’in ne’ebé afeta hosi projetu loke estrada foun iha área suku Beloi ba kampu aviasaun Ataúro katak, sei laiha indeminizasaun ba ai-fuan no ai-horis no arguidu uza nia podér hodi autoriza ekipamentu olipezadu hosi MOP atu suru no ke’e sai ai-horis no ai-fuan komunidade nian.

Tanba ne’e, iha uma-ka’in rua hanesan Paulo de Araújo Saldanha no António Saldanha mak la konkorda ho desizaun arguidu nian, tanba prezudika uma-ka’in rua ne’e nia hudi hamutuk hun 244 mak hetan estragus to’o agora laiha indemnizasaun.

Arguidu na’in-rua hatene katak, osan subsídiu ne’ebé Ministériu Saúde entrega ho finalidade atu rekompensa ai-han no ai-horis ba kada uma-ka’in hamutuk 44, ne’ebé hetan estragus impaktu hosi projetu konstrusaun provizóriu kampu aviasaun Ataúro.

Ho hahalok arguidu na’in-rua nian, hamosu prezuizu ba komunidade nia ai-horis, tanba ne’e MP akuza arguidu na’in-rua ba prátika krime pekulatu no abuzu de podér ne’ebé previstu iha artigu 295 no 297.

Audiénsia julgamentu iha Kuarta loron 09 fulan ne’e, prezide hosi juiz kolektivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogério Viegas no arguidu hetan asisténsia legál hosi Defensór Públiku Nelson Borges.

Jornalista: Carmelita Isaac