Hatutan.com, (09 Fevereiru 2022), Dili—Iha Tersa 08 Fevereiru, maizumenus tuku 19:00 otl, mosu kazu insidente ida iha área Bebonuk, ne’ebé rezulta vítima Levi Gomes hakotu-iis (mate) ho kondisaun isin latan hela iha rai-leten besik fahi-luhan, iha nia uma-sorin, aldeia 20 Sembru, Suku Madohi, Postu Administrativu Dom Aleixo, Munisípiu Díli.

Matebian Levi Gomes hakotu-iis (mate) ho kondisaun isin latan hela iha rai-leten besik fahi-luhan, iha nia uma-sorin, aldeia 20 Sembru Suku Madohi, Postu Administrativu Dom Aleixo Munisípiu Díli, (08/02/2022). Foto/Facebook.

Hafoin insidente ne’e, parte família no viziñua informa kedan ba parte Polísia Nasionál Timor-Leste (PNTL), liuhosi membru sira iha Eskuadra Dom Aleixo, ba to’o kedan iha fatin akontesimentu hodi halo atendimentu.

Komandante PNTL Eskuadra Dom Aleixo, Inspetór Asistente, Américo Fátima da Costa informa, durante halo observasaun ba kazu insidente ne’e iha fatin akontesimentu nota katak, 75% vitima mak oho an, maibé 25% deskonfia ema deskoñesidu mak oho.

“Ami nia observasaun temporáriu ba situasaun ida ne’e, katak nia oho an rasik ne’e kuaze 75%, no 25% ami sei deskonfia. Tanba laiha indikasaun uza forsa, laiha indikasaun iha sasán ruma at ka laiha ema ruma halo ofensa ba nia,” Komandante PNTL Eskuadra Dom Aleixo, Inspetór Asistente, Américo Fátima da Costa, hateten ba jornalista sira iha kna’ar fatin, Kuarta (09/02/2022).

Advertisement

Informasaun seluk ne’ebé PNTL rekolla hosi vítima nia feen-kaben katak, antes ne’e sira na’in-rua iha duni problema ki’ik oan ida no konsege istóri-malu iha uma-laran.

Alende ne’e, vítima mós sofre hela moras iha nia isin, maibé seidauk identifika loloos moras saida mak afeta ba iha vitima nia saúde fízika. Hafoin iha Segunda, 08 Fevereiru 2022 oras lorokraik vítima kadi ‘halimar’ hela tudik iha sira nia uma.

“Ne’e mak lorokraik ne’e nia rasik mak kadi tudik ne’e, nia família sira dehan, uza atu koa modo nia dehan la’e husik ha’u mak kadi tudik ne’e halo kro’at de’it. To’o fali kalan, akontesimentu iha tuku 20:00, vítima ko’a nia kakorok iha fahi luhan, besik ninia uma sorin,” Inspetór Asistente, Américo Fátima da Costa, konta tuir.

Hafoin rekolla tiha informasaun kona-bá kazu ne’e iha fatin akontesimentu, PNTL komunika kedan ba ambulánsia hodi transporta kedan matebian ba iha Hospitál Nacional Guido Valadáres (HNGV), Bidau-Díli hodi submete ba prosesu autópsia.  

“To’o bá nia mate kedan iha fatin ho kondisaun kanek kuak iha kakorok. Agora daudaun ita enkamiña ona ba iha Ospitál hodi halo autópsia,” komandante Américo hateten.

Advertisement

Tuir observasaun Hatutan.com nian iha terrenu nota katak, daudaun ne’e Polisia Nasionál Servisu Investigasaun Kriminál (PNSIK), bolu ona matebian nia familia, inklui feen-kaben, hamutuk ema na’in-12, hodi ba hato’o deklarasaun kona-bá kazu ne’e iha Polísia.

Matebian Levi Gomes (42), oríjen hosi Suku Makadadi, Postu Administrativu Ataúro no iha Díli hela iha área Bebonuk, aldeia 20 Setembru, Suku Madohi, Postu Administratu  Dom Aleixo.

Durante ne’e vítima servisu hela iha Média Timor Post, nu’udár vendedór jornál no mós transporta jornál ba entrega iha kliente sira inklui ministériu sira iha kapitál nasaun.

Jornalista: Rogério Pereira Cárceres

Advertisement