Hatutan.com, (15 Fevereiru 2022), Díli—Polísia Nasionál Timór-Leste (PNTL), liuhosi Unidade Polísia Marítima (UPM), detein sidadaun Indonézia mane na’in-ida, tanba hala’o peska ho ró ilegalmente tama mai territóriu nasionál, iha área Palaka, Postu Administrativu Atabae, Munisípiu Bobonaro.

Sidadaun Indonézia mane na’in-ida, ne’ebé hala’o peska ho ró ilegalmente tama mai territóriu nasionál, iha área Palaka, Postu Administrativu Atabae, Munisípiu Bobonaro, 15 Fevereiru 2022. Foto/PNTL.

“Horikalan UPM hala’o patrullamentu iha área Atabae nian no iha tuku 02:19 madrugada konsege detein peskadór ilegál mane na’in-ida iha area Palaka ho naran inisiál HR, tinan 49, hela iha Fatuluka-Atambua, RT, 004 RW 002, Suku Jenilu, Postu-Administrativu Kakuluk Mesak, Munisípiu Belu-Atambua,” Hatutan.com sita deklarasaun Komandante PNTL Munisípiu Bobonaro, Superintendente Polísia António Mauluta, iha komunikadu.

Komandante Mauluta haktuir, detensaun ba sidadaun Indonézia ne’e hamutuk ho evidénsia ró ida tipu Fiber Glass modelu Nautilus ne’ebé suspeitu sosa hosi produsaun rai-laran iha Bidau-Díli.

Hafoin foti identidade, Komandante Postu UPM Atabae entrega kedan sidadaun Indonézia ne’e ba Eskuadra PNTL Atabae no agora daudaun halo hela koordenasaun ho parte saúde, hodi haree asuntu saúde ba prevensaun Covid-19 nian, depois sei enkamiña ba Ministériu Públiku no sei iha koordenasaun ho Diresaun Jerál Servisu Migrasaun hodi prosesa tuir Lei Imigrasaun no Ázilu númeru: 11/2017.

PNTL Munisípiu Bobonaro nafatin servisu hamutuk ho Unidade Fronteira no Unidade Marítima hodi asegura fronteira no sei la tolera ameasa saida de’it mak hasoru soberania nasionál no riku-soin iha tasi no rai-maran.

Jornalista: Rogério Pereira Cárceres