Hatutan.com (18 Fevereiru 2022) Díli—Tribunál Distritál Díli (TDD) liu hosi leitura sentensa ne’ebé lee hosi juiz koletivu Alvaro Maria Freitas, José Gonçalves, Argentino Nunes, deside aplika pena prizaun tinan haat, maibé suspende tinan tolu ba arguidu Joel Viegas.

Sala julgamentu Tribunál Distritál Díli. Foto/Hatutan.com.

Pena suspensaun ne’e aplika ba krime abuzu de konfiansa agravadu, tanba garante lezadu Frederico Soares Sarmento nia karreta vaskolante ba Atanasio da Cruz.

Notisia uha Relasaun:Defensór Públiku Husu Absolve Joel Viegas Hosi Krime Abuzu Konfiansa

TDD esplika razaun aplikasaun pena suspensaun tanba maski faktus provadu hotu katak arguidu garante nia kolega lezadu nia vaskolante ba ema seluk hodi utiliza fali motór, maibé TDD konsidera arguidu koopera hodi konfesa faktus iha akuzasaun.

Tanba ne’e, arguidu la presija tama komarka maibé durante tinan tolu iha liur, arguidu labele komete kualkér aktu krime no bainhira komete arguidu tenki ba kumpri pena prizaun tinan haat.

Alende ne’e, Tribunál mós deside arguidu tenki selu indinimizasaun sivil ba lezadu ho montante $5.000, ne’ebé sei intrega liu hosi TDD kada fulan ho montante $266 iha loron 25 no oras tuku 9:00.

Antes ne’e, tuir akuzasaun ne’ebé iha katak, arguidu ho lezadu nu’udár kolega di’ak, tanba ne’e lezadu entrega nia karreta vaskolante ida ho númeru matrikula 57-348 TIS ba arguidu nu’udár kondutór hodi servisu buka osan no kada fulan selu $200.

Maibé, iha tinan 2017 lezadu nia vaskolante hetan kontratu ho kompañia ne’ebé hala’o servisu iha Projetu Kablaki iha Suai ho kada fulan hetan pagamentu $1.700.

Tanba ne’e, lezadu fó konfiansa ba arguidu kaer lezadu nia karreta hodi hala’o servisu iha Suai, maibé ikus mai iha fulan Outobru to’o Novembru 2017, arguidu Ia lori lezadu nia karreta ba uma, no lezadu buka tuir maibé telefone ba arguidu bosok tun sa’e de’it.

Tanba ne’e, lezadu buka tuir arguidu to’o iha Suai no lezadu hetan karreta iha fali Atanasio da Cruz Abel mak kaer no lezadu husu tuir afinál arguidu garante tiha ona lezadu nia karreta ba Atanasio hodi impresta motorizada hodi ba Dili no ikus mai Atanasio haruka lezadu selu fali motorizada ne’ebé arguidu lori ba Díli ho valór $1.800, maibé to’o agora lezadu haruka arguidu selu fali lezadu nia osan maibé la selu.

Tanba ne’e, MP akuza arguidu ba prátika krime abuzu Konfiansa agrvadu ne’ebé previstu iha artigu 257 hosi kódigu penál TL.

Audiénsia julgamentu iha Sesta 18 fulan ne’e, prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradora Benvinda do Rosário no arguidu hetan asisténsia legál hosi Defensór Públiku Amado Babtista.

Jornalista: Carmelita Isaac