Hatutan.com, (18 Fevereiru 2022), Díli– Tribunál Distritál Díli (TDD) kontinua hala’o julgamentu ba krime esplorasaun jogu ilísitu no frauda fiskál ne’ebé deskonfia involve diretór kompañia Happy Royal, arguidu Bernardo Amaral Correia ho Diretór empreza Tixar Unipesoal Lda arguidu Luis Clementino Xavier, tanba hala’o atividade esplorasaun jogu slot mákina ne’ebé laiha lisensa no autorizasaun hosi Governu.

Julgamentu kontinuasaun iha Sesta 18 fulan ne’e, sasin Miguel dos Santos Lobato deklara bazeia ba dekretu lei númeru 6/2016 kona-bá regras hodi loke jogu slot mákina hateten, primeiru kompañia tenki hato’o proposta liu hosi konkursu ne’ebé loke, maibé ho kritéria emprezáriu tenki iha kapasidade finanseira atinji millaun $10 iha Banku.

Maibé, iha tinan 2016 inspesaun de jogu loke konkursu ba kompañia ne’ebé hakarak loke jogu slot mákina, no iha konkursu ne’e iha kompañia rua mak prienxe rekejitu tanba iha kapasidade finanseira atinji millaun $10, maibé kompañia ida lakohi, tanba ne’e kompañia Timor Holding Group mak avansa.

Tuir sasain nia hatene katak, Governu atribui ona lisensa no autorizasaun ba kompañia Timor Holding Group no sira seluk seidauk tanba seidauk iha konkursu.

“Momentu ha’u la asumi ona kargu hanesan Diretór inspesaun de jogu. Ha’u rona Tribunál hasai mandadu buska no apreensaun ba kompañia rua, ida iha Hudi laran no ida iha Audian. Maibé, se la sala ida mak kompañia Happy Royal, tanba laiha lisensa no autorizasaun hodi loke jogu slot mákina,” sasin deklara.

Hafoin rona sasin, juiz prezide adi’a julgamentu ba loron seluk hodi kontinua rona sasin sira seluk.

Ministériu Públiku (MP) akuza arguidu na’in-rua ba krime esplorasaun jogu ilísitu no frauda fiskál ne’ebé previstu iha artigu 322, 314 hosi kódigu penál Timor Leste, tanba laiha lisensa no autorizasaun ba atividade jogu slot mákina.

Audiénsia julgamentu prezide hosi juiz singulár Evangelino Bello, MP reprezenta hosi Prokuradór Rogério Viegas no arguidu na’in-rua hetan asisténsia legál hosi Defensór Públiku Juvinál Dias Ximenes.

Jornalista: Carmelita Isaac