Hatutan.com, (25 Fevereiru 2022), Díli—Asosiasaun HAK identifika mosu violasaun direitus umanus iha prizaun tolu hanesan estabelesimentu prizaun Becora, Gleno no Suai.

Diretór Azekutivu Asosiasaun HAK, Sisto dos Santos. Foto/Hatutan.com

Identifikasaun ne’e bazeia ba rezultadu monitorizaun ne’ebé HAK halo durante períudu Janeiru to’o Dezembru tinan 2021 ho métodu entervista ho dadur sira.

Notisia iha Relasaun:Guarda Prizionál na’in tolu komete infrasaun

Rezultadu monitorizasaun hatudu katak, iha violasaun direitus umanus ne’ebé akontese ba dadur iha prizaun laran mak hanesan primeiru dadur ho estatutu prizaun preventiva kontinua detein to’o tinan haat.

Segundu, 80% dadur la koñese sira nia advogadu ka Defensór públiku, terseiru dadur ho moras defisiente mentál sei hela hamutuk ho dadur bai-bain, no kuartu bebé ida hela hamutuk ho inan hanesan dadur inklui dadur feto no mane sei hela hamutuk iha bloku ida de’it.

“Iha situasaun Covid-19 no konfinamentu obrigatóriu liu-liu iha prizaun Becora akumula dadur liu 500 ne’ebé liu kapasidade, dadur juvenil 27 sei nafatin hela bloku ida de’it ho ema adultu inklui mós família dadur labele vizita durante Covid-19,” Diretór Asosiasaun HAK, Sisto dos Santos hateten, hafoin lansamentu relatóriu kondisaun Direitus Umanus prizaun Becora, Gleno no Suai iha Faról-Díli, Sesta (25/02/2022).

Alende ne’e, programa Tribunál móvel ladun la’o efetivu, tanba menus rekursu umanus no finanseira ne’ebé halo dadur sira tenki hela iha prizaun ho durasaun tempu naruk maske durasaun tempu ba prizaun preventiva másimu tinan tolu de’it.

Hosi violasaun direitus umanus ne’ebé akontese ba dadur sira, HAK sujere ba Parlamentu Nasionál (PN) hodi tau prioridade, liu hosi alokasaun orsamentu no programa nune’e bele hadi’a iha futuru.

Alende ne’e, sujere atu aplika mós pena de traballu ba dadur, nune’e dadur labele han toba de’it iha prizaun, maibé tenki halo servisu hodi sustenta ekonomia familia ne’ebé bele redus despeza Estadu.

Hatán ba ejizénsia  ne’e, reprezentante Ministru Justisa (MJ) Amilcar Soares Seixas kompromete sei halo esforsu hodi hadi’a iha futuru, tanba rezultadu monitorizasaun ne’e sei sai sasukat ba planu Governu nian.

“Ne’e kompeténsia Governu nian, ami hanesan ezekutór hala’o de’it buat ne’ebé iha. Maibé ne’e sai hanesan sasukat ba Governu oinsa bele hadi’a iha futuru, daudaun politika Governu nian muda ba mai, no ita iha esforsu atu hadi’a postu sanitáriu no hadi’a bloku ne’ebé a’at hodi garante kondisaun dadur iha Prizaun laran,”nia hateten.

Oras ne’e daudaun  dadur iha estabelesimentu prizaun Becora, Gleno no Suai hamutuk na’in 697.

Jornalista: Carmelita Isaac